Bi aste baino gutxiago falta dira Euskal Herriko 64. Itzulia egiteko, eta probaren inguruko xehetasun nagusiak jakinak dira jada. Ibilbidearen berri eman eta gero, lehiatuko diren txirrindularien berri eman dute gaur antolatzaileek. Aurreikusi bezala, izar distiratsuenak ez dira lehiatuko. Iaz Jonas Vingegaard (Visma), Primoz Roglic (Red Bull) eta Remco Evenepoel (Soudal) aritu ziren, baina aurten hiru horietako bakar bat ere ez da ariko, ezta Tadej Pogacar (UAE) ere. Esloveniarra duela lau urte lehiatu zen azkenekoz Itzulian.
Big four (lau handiak) deitzen dioten laukotea ez da irteeran izango, ezta koska bat beherago dauden hainbat txirrindulari ere; adibidez, azken irabazleak, Juan Ayusok (UAE), ez du Itzulia sartu bere egutegian. Gauza bera egin du Mikel Landak (Soudal).
Izarrak faltako dira, baina horrek ez du esan nahi txirrindulari oso onak ariko ez direnik. Hauek nabarmentzen dira Itzulian parte hartuko dutenen artean: Sepp Kuss (Jumbo-Visma), Daniel Felipe Martinez (Red Bull-Bora), Enric Mas (Movistar), Joao Almeida, Isaac del Toro eta Brandon Mcnulty (UAE), Ion Izagirre (Cofidis) eta Pello Bilbao (Bahrain). Martinez eta Izagirre Euskal Herriko Itzulia irabazitakoak dira. «Ez dago oilarrik, baina lasterketa polita eta dibertigarria izango da. Ondo pasatuko dugu», esan du Javier Riaño Euskal Herriko Itzuliaren zuzendari nagusiak.
Apirilaren 7an hasiko da Itzulia, Gasteizen, Buesa Arena pabiloiaren barruan, bakarkako erlojupeko batekin. Bukatu, berriz, 12an bukatuko da, Eibarren (Gipuzkoa). Etapa hauek egingo dituzte: Gasteiz-Gasteiz (16,5 kilometro); Iruñea-Lodosa (199,8); Zarautz-Beasain (156,3 kilometro); Beasain-Markina-Xemein (169,6 kilometro); Urduña-Gernika-Lumo (172,4 kilometro); eta Eibar-Eibar (153,6 kilometro).
Txirrindulariek 864,70 kilometro egingo dituzte; gorabeheratsuak eta gogorrak izango dira horietako asko, 27 mendatetara igoko baitira. Azken ekitaldietako ibilbideen antzekoa da aurtengoa.
