Ivanovicek zuzenduko du Baskonia gaur, Euroligan

SASKIBALOIA. Velimir Perasovicek joan den astean bukatu zuen Kirolbet Baskoniako entrenatzaile postuan egin duenhirugarren aldia. Haren ordezkoak, Dusko Ivanovicek, hirugarren aldia hasiko du Gasteizko taldean. Baskoniak herenegun jakinarazi zuen entrenatzaile hori fitxatu zuela, eta gaur bertan jarriko da aulkian. Kirolbet Baskoniak Berlinen jokatuko du, Albaren aurka, Euroligako hamaseigarren jardunaldian (20:00).

Ivanovicek Turkiako Besiktas taldearekin zuen kontratua eten zuen joan den asteburuan, denboraldi hasiera txarra egin ondoren —bortz garaipen eta zortzi porrot Turkiako ligan, eta hiru garaipen eta sei porrot Txapeldunen Ligan—. Baskonia bitan entrenatu du: 2000-2005 artean lehenengoz, eta 2008-2012 artean bigarrenez. Baskoniaren historian titulu gehien irabazi duen entrenatzailea da: ACBko bi liga (2001-2002 eta 2009-2010), Espainiako hiru kopa (2001-2002, 2003-2004 eta 2008-2009), eta Espainiako Superkopa bat (2008-2009). Baskoniak Euroligan jokatu dituen bi finalak ere Ivanovicek zuzenduta jokatu zituen, 2000-2001ean eta 2004-2005ean.

Montenegroarrak denboraldi bukaerara arte sinatu du, eta taldearen norabide okerra zuzentzea du helburu. Gaur du lehenengo proba, Euroligan. Baskonia hamahirugarrena da sailkapenean, sei partida irabazi eta bederatzi galduta —azken biak galdu ditu—. Alba Berlin hamaseigarren dago, azken-hirugarren tokian, lau partida irabazi eta 11 galduta —azken laurak galdu ditu—. Perasovic kaleratu ondorengo trantsizioko partida Josep Maria Berrocalek zuzendu zuen, joan den igandean, ACB Ligan. Galdu egin zuen Baskoniak, Burgosen aurka (74-82). Asteburuan Zaragozaren aurka jokatuko du, eta, datorren astean, Bartzelona hartuko du, Euroligan.