Ikuskizuna eman nahi dute berriro

Lehendabizikoa eta hemeretzigarrena. Rafa Nadalek Australiako Irekiko finala jokatuko du bihar aurreneko aldiz Roger Federerren aurka. Kataluniarrak Fernando Verdasco kanporatu zuen atzo Melbourneko pistan, bost ordutik gorako partida jokatuta (6-7, 6-4, 7-6, 6-7 eta 6-4). Nadalek eta Federerrek, munduko bi tenislari onenek, hemeretzigarren partida jokatuko dute elkarren aurka. Manacorrekoak hamabi bider irabazi du lehia klasikoa. Suitzarrak, berriz, sei aldiz. Orain arteko azken finala Wimblendonen jokatu zuten, iaz. Partida historikoa izan zen. Ikuskizun bera errepikatzea zaila izango da, baina ziur saiatuko direla.

Izerdia eta nekea. Nadalek eta Verdascok finalerdi luzea jokatu zuten atzo. Biak ala biak sendo aritu ziren. Guztira, bost set jokatu zituzten, eta horietako hiru tie-break-ean erabaki ziren. Hain justu, lehen seta tie-break-ean irabazi zuen espainiarrak. Bigarren eta hirugarren setak, ordea, Nadalek irabazi zituen. Kataluniarrak jokorik onena erakutsi eta zorte pixka batekin aurrea hartu zuen. Baina Verdascok ez zuen amore eman. Finalerdietara ez zen besterik gabe iritsi. Aurretik, Andy Murray eta Wilfried Tsonga gainditu zituen; munduko laugarren tenislaria eta iazko finala jokatu eta galdu zuen frantziarra, hurrenez hurren. Horrela, espainiarrak laugarren seta irabazi, eta bosgarrena behartu zuen.

Finala gertu eta urrun. Verdascok urduri jarri zuen Nadal. Finalera hurbiltzen ari zen. Baina kataluniarrak presioa gainditu eta behar bezala bideratu zuen azken seta. Gero espainiarraren oparia iritsi zen. Seta berdintzeko aukera zuela, Verdascok lehen sakea kanpora bota zuen, eta bigarrena sarera. Falta bikoitza egin zuen. Sarera bota zuen bost orduan egindako lan ona.

Mendekua eta marka

Bigarren finalerdia jokatu aurretik, Federerrek adierazi zuen finala Verdascoren kontra jokatu nahi zuela. Bihar, ordea, Nadalekin konformatu beharko du. Suitzarra aise zebilen tenisean kataluniarra agertu zen arte. Lorpenen zakua ez du horren erraz gizentzen ordutik. Ondorioz, bihar mendekua hartu nahiko du. Horrezaz gainera, Australiako Irekiko historian Nadal finalera iritsi den laugarren kataluniarra da. Aurretik, Juan Gisbert, Andres Gimeno eta Carlos Moya iritsi ziren. Hirurek galdu egin zuten. Hori dela eta, Nadalek aukera paregabea du historia egiteko. Pixka bat gehiago.

Serena Williamsek laugarren titulua irabazi nahi du gaur, Safinaren kontra

Australiako Irekiko emakumezkoen finala jokatuko dute gaur Serena Williamsek eta Dinara Safinak. Estatubatuarrak eskura du laugarren titulua, baina, horretarako, Safina gaztea gainditu beharko du. Errusiarra bolada onean dago, baina azken pausoa du emateko. Pekingo Olinpiar Jokoetan zilarra irabazi zuen, eta aurten Sydneyko txapelketako finala galdu du, Elena Dementievaren kontra. Melbournen Grand Slam bateko lehen finala jokatuko du, 22 urterekin. Bost gehiago ditu Serena Williamsek, eta zenbait gorabehera gainditu ondoren, titulua irabazteak konfiantza emango dio aurrera begira. 2003an irabazi zuen lehenengo aldiz Australiako Irekia. Gerora, 2005ean eta 2007an izan zen indartsuena.Estatubatuarrak bi urtetik behin lortu du titulua, eta aurten ere hala izan beharko luke.