Juan Izquierdo futbol jokalari uruguaitarra hil da bart, 27 urte zituela. Sao Paulon ospitaleratuta zegoen ostegunetik, Brasilen, bihotza gelditu baitzitzaion han Libertadores kopako partida bat jokatzen ari zela. Lehiaketa hori Txapeldunen Ligaren parekoa da Hego Amerikan.
Izquierdoren taldeak baieztatu du albistea sare sozialetan, Nacional de Montevideok: «Munduko minik sakonenarekin, gure jokalari maite Juan Izquierdoren heriotzaren berri eman behar dizuegu. Doluminak bidali nahi dizkiegu haren familiartekoei, lagunei, adiskideei eta ahaideei. Talde osoa doluan dauka atzera-bueltarik ez duen galera honek. Juan, beti egongo zara gurekin».
Con el más profundo dolor e impacto en nuestros corazones, el Club Nacional de Football comunica el fallecimiento de nuestro querido jugador Juan Izquierdo.
— Nacional (@Nacional) August 28, 2024
Expresamos nuestras más sinceras condolencias a su familia, amigos, colegas y allegados.
Todo Nacional está de luto por… pic.twitter.com/mYU28mqw6m
Uruguaitarra Morumbi estadioan ari ziren jokatzen, Sao Pauloren aurka, bihotza gelditu zitzaionean —zehazki, 83. minutuan—. Libertadores kopako final-zortzirenei zegokien norgehiagoka. Han bertan saiatu ziren jokalaria suspertzen, baina ospitalera eraman behar izan zuten berehala. Bi orduren buruan, medikuaren lehen argibideen berri eman zuen taldeak: Izquierdo ZIU zainketa intentsiboetako unitatean zegoen, «egonkor», baina behaketan.
Egunak pasatu ahala, baina, futbolariaren osasunak okerrera egin zuen. Hori ikusita, familiak komunikatu bat plazaratu zuen, jarraitzaileei babesa eskatzeko: «Mesedez, errezatu ezazue. Bidali indarra eta energia ona, Juanmak behar ditu eta. Etxean behar dute zortzi eguneko semeak eta 2 urteko alabak».
Uruguaiko Gobernuko Kirol idazkari Sebastian Bauzak astelehenean kontatu zuenez, Izquierdori bihotzeko arritmia bat atzeman zioten 2014an, gobernuak sustatutako egitasmo batean egindako azterketa batean. Jokalariak 17 urte zituen orduan. Hango prentsak jaso duenez, gurasoek eta taldeak ez zuten diagnostiko horren berri, eta haserre agertu dira horregatik.
Futbolariak ibilbide oparoa izan du goi mailan. Zortzi titulu irabazi ditu, guztiak Uruguaiko taldeekin: lau Liverpoolekin, hiru Nacional de Montevideorekin eta beste bat Peñarolekin.
