Goikoetxeatarrek irabazi dute BERRIAk eta Oriamendi 2010 enpresak elkarlanean antolatutako BERRIA Txapelketa, final bizi eta estu batean. Ander Goikoetxeak eta Joseba Goikoetxeak 2-0 irabazi dute Urtzi Gurrutxagaren eta Aritz Eskuderoren kontra. Lehen setean 15-12 gailendu dira gorriak, eta bigarrengoan, 15-10. Bi set baino ez dituzte behar izan txapela janzteko, baina tentsio handiko finala jokatu dute.
Pozarren agertu dira irabazleak lehia bukatu berritan. Goikoetxea V.a: «Txapelketan behetik gora egin dugu. Bagenekien finala zaila izango zela, eta irabazi nahi bagenuen borrokatu egin beharko genuela; oso gustura nago. Maila ona eman dudala uste dut». Aurrelari urnietarrak eskarmentu handia du, eta hura izan da finaleko onena. Bikotean hark zuen ardurarik handiena, eta ez du huts egin; hamazazpi tanto egin ditu, eta bakarra huts egin.
Goikoetxea V.ak lehen aldiz irabazi du BERRIA Erremonte Txapelketa. Bigarren txapela du, berriz, Goikoetxea VI.ak. Bi aldiz aritu da, eta bietan irabazi du: iaz eta aurten. Neurria hartu dio txapelketari: «Ez nintzen gustura hasi, baina buelta emateko gai izan gara. Ander nire entrenatzaile izandakoa da, asko lagundu dit, eta ilusioa egiten dit txapel hau berarekin irabazteak».
«Bagenekien finala zaila izango zela, eta irabazi nahi bagenuen borrokatu egin beharko genuela; oso gustura nago»
ANDER GOIKOETXEAOriamendiko erremontista
Biek aipatu dute finala «gogorra» izan dela. Indarrak parez pare hasi dira, eta hala erakutsi du markagailuak ere: 6-6. Gurrutxagak eta Eskuderok argi zuten zer egin: Ander Goikoetxea ez sartzea jokoan, eta Joseba Goikoetxea behartzea. Horretan aritu dira, eta tartea zabaltzea ere lortu dute urdinek: 7-11 eta 9-12.
Gero, ordea, bete-betean sartu da Goikoetxea V.a partidan, joarekin eta aukerako pilotak ondo aprobetxatzen, eta berehala irauli dute markagailua gorriek, sei tanto erreskadan eginda. Azkenean, 15-12 irabazi dute lehen seta.
Eskuderoren arabera, hor egin die alde finalak: «Behera etorri naiz animikoki, eta ez dut lortu buelta ematea. Salduta utzi dut Urtzi. Ez dugu asmatu Anderri pilota kentzen».
Bigarrenean ere, zaharrak berri. Bizi-bizi ekin diote lehiari, eta pilotakada askoko eta tentsio handiko tantoak jokatu dituzte. Markagailuan ere islatu da parekotasun hori (8-8), baina azken txanpan berriro aurre hartu dute goikoetxeatarrek: 8-9 zihoazela, bost tanto jarraian egin dituzte, eta finala bideratuta utzi. Ez diote utzi errentari ihes egiten, eta merezita irabazi dute txapela. Bikote sendoa osatu dute, eta ondo baliatu dituzte urdinen txakalaldiak.
«Ander nire entrenatzaile izandakoa da, asko lagundu dit, eta ilusioa egiten dit txapel hau berarekin irabazteak»
JOSEBA GOIKOETXEAOriamendiko erremontista
Gurrutxagak aitortu du ez dela guztiz eroso aritu: «Ongi hasi naiz, baina guk galdu dugu partida. Behera etorri naiz bigarren setean». Oilartuta eta ondo ekin dio finalari kantxako gazteenak, baina gehiago kostatu zaio gero.
Azkenean, txapelketa osoan bezala behetik gora eginda, Goikoetxea V.ak eta Goikoetxea VI.ak biribildu dute lana. Haiek dira BERRIA Txapelketaren bosgarren ekitaldiko irabazleak.
