Gino Mader Bahrain taldeko txirrindularia hil da, atzo Suitzako Itzulian izandako erorikoaren ondorioz. Hala jakinarazi du bere taldeak, Bahrainek. Maeder suitzarra zen, eta 26 urte zituen. Pello Bilbaoren eta Mikel Landaren taldekidea zen. «Lur jota gaude Ginoren heriotzarengatik. Haren talentua, lana eta grina gure inspirazio izango dira beti», adierazi du Milan Erzen taldeko zuzendariak.
Maederrek etapako 197. kilometroan izan zuen erorikoa, Albulapass (15 km, %6,7) mendatea jaisten ari zirela. Amildegi batetik erori zen, eta konorterik gabe geratu zen. Kolpe handia jaso zuen buruan. Medikuek suspertu egin behar izan zuten, eta helikopteroz eraman zuten oso larri, Churreko erietxera. Hantxe hil zen ordu batzuk geroago. Istripu horretan ere Magnus Sheffeld (Ineos) txirrindulariak min hartu zuen, baina arriskutik kanpo dago.
Etapa amaieran, hainbat txirrindularik kritikatu zuten ibilbidea, tartean Remco Evenepoelek (Quick Step).«Ez da ideia ona izan halako jaitsiera bat jartzea etapa amaitzeko. Beti gertatu behar dira halako gauzak neurriak hartzeko».
Maeder talentu handiko txirrindularia zen. Haren garaipen zerrendan daude, besteak beste, 2021ean Italiako Giroan eta Suitzako Itzulian irabazitako etapa bana. Gainera, postu onak lortu zituen Paris Nizan eta Espainiako Vueltan. Dimension Datak eman zion profesionaletan aritzeko aukera 2018an, eta 2021ean sinatu zuen Bahrainekin.
