Garaipen garratza

Kito. Egin du Super Amara Bera Berarenak EHF kopan. Donostiako taldeari maldan gora jarri zitzaion bigarren kanporaketa, Errumanian, joanekoan, bost golen aldeaz galduta. Etxean kanporaketa iraultzea beste aukerarik ez zuen aurrera egiteko. Eta kale egin zuen asmo horretan. Irabazi, irabazi egin zuen itzulikoa, baina erdibidean geratu zen, gol bakar batengatik nagusitu baitzitzaion Corona Brasovi atzo Gaska kiroldegian: 33-32. Beraz, lehiaketatik kanpo gelditu zen.

Nahi baino gutxiago lehiatu eta gozatu ahal izan dute donostiarrek EHF kopan. Kolpea da, itxaropena baitzuten lehiaketa horretan aurrerapausoa emateko. Baina beste aldi batean izan beharko du. Kanporatzeari zerbait ona bilatzekotan, Bera Berak aukera izango du orain Espainiako Ligan eta kopan buru-belarri aritzeko. Balorazio hori, baina, egun batzuk igarota egin beharrekoa da, atsekabea pasatutakoan.

Donostiarrek argi zuten egitekoa aukeraren bat izateko: sendo aritu behar ziren defentsan, bizkor jokatu eta eraginkorrak izan erasoan. Hori egin ezean, oso zail izango zuten Brasov ustekabean harrapatzea. Ondo bete zuten egitekoa lehen hogei minutuetan, eta horri esker, hiru golen aldea lortu zuten: 12-9. Helburua lortzeko bidean ziren. Egiten ari zirenari eutsi egin behar zioten.

Baina Brasoveko entrenatzaileak hutsartea eskatu zuen, eta etenalditik bueltan, goitik behera aldatu zen neurketa. Timoxenkovak harresia eraiki zuen atean, eta erasoan, Tirca etxekoen defentsa zigortzen hasi zen behin eta berriro. Hala, errumaniarrek 2-9ko partziala lortu zuten lehen zatiko azken hamar minutuetan: 12-9tik 14-18ra pasatu zen emaitza. Bigarren zatia falta zen jokatzeko, baina miraria behar zuen Bera Berak sailkatzeko: bederatzi golen aldeari buelta eman behar zion ordu erdian. Ez zen halakorik gertatu. Gutxienez, irabazten saiatu ziren etxekoak, eta hori, behintzat, lortu zuten, azken minutuetan behetik gora eginda. Garaipena azkenean, baina garaipen garratza.