Gaur gertatu dena baliteke erabakigarria izatea datozen jardunaldietan. Horren jakitun kantxaratu dira bi bikoteak Gasteizko Ogeta pilotalekura, eta, azkenean, lana gogotik eginda, Peio Etxeberriak eta Zabaletak eskuratu dute puntua (19-22). Bikotearen zazpigarrena da. Laurekin utzi dituzte Jokin Altuna eta Martija, eta sailkapenean tartea nabaria da orain. Txapelketako orain arteko neurketarik luzeena izan da: 86 minutu iraun ditu.
Lehia parekatua izan da, eta berdinketa ugari erakutsi ditu markagailuak. Etxeberria nabarmendu da, aurreko koadroetan erakutsi duen ausardiagatik; hori azpimarratu du Zabaletak berak. Hamar tanto egin ditu; Altunak, berriz, lau. Xehetasunetan erabaki da norgehiagoka, eta urdinek gehiago asmatu dute azken tantoetan.