FUTBOLA. EIBAR. Ejidoren aurka ariko da gaur Eibar, lehen itzulian lau gol sartu zizkion aurkariaren kontra

Eibar denboraldia bikaina egiten ari da. Bigarren da sailkapenean, eta aurkari guztiek errespetuz begiratzen diote. Lehen itzuliak, ordea, arantza txiki bat utzi zion Jose Luis Mendilibarren taldeari; hain zuzen, Ejidoren aurka 4-1 galdu zuen partida. Gaur aurkari bera izango dute aurrean armeroek (17:00etan), eta lehen itzuliko partida horren mendeku hartu nahi dute, etxean. Eibarko zaleak ere garaipen gosez dira, taldeak Ipuruan jokatu dituen azken bost partidetan ez baitu irabaztea lortu. Javier Burgueña min hartuta dago, baina, gainerakoan, Mendilibarrek jokatzeko prest ditu jokalari guztiak. Ziurrenik, Malaga Bren aurka aritu zen hamaikakoa aterako du hasieratik.