Ziklo-krosa

Fem van Empelek irabazi du Munduko Ziklo-kros Txapelketa, hirugarrenez

Lehen lau sailkatuak herbeheretarrak izan dira. Lucinda Brandek eta Puck Pietersek osatu dute podiuma.

CZECH REPUBLIC CYCLING
Fem van Empel, iazko Munduko Txapelketan, garaipena ospatzen. MARTIN DIVISEK / EFE
inaut matauko rada
2025eko otsailaren 1a
16:30
Entzun 00:00:0000:00:00

Laranja izan da aurtengo ziklo-kroseko Munduko Txapelketako kolorea. Txirrindulari herbeheretarrek hartu dituzte lehen lau postuak Lievinen (Frantzia): Fem van Empelek irabazi du aurten ere, eta hirugarrenez jantzi du ostadar maillota. Hemezortzi segundora sartu da Lucinda Brand, eta dezente atzerago, irabazlearengandik minutu eta hamar segundora, Puck Pieterse sartu da. Laugarrena, Inge van der Heijden, minutu eta 32 segundora sartu da. Bosgarren postuan sartu da Blanka Vas hungariarra, lehen ez-herbeheretarra; garailea baino minutu eta 56 segundo geroago sartu da.

Hasieratik hartu dute aurrea herbeheretarrek. Lehen itzulian, podiumera igo diren hiru txirrindulariak aurreratu dira, eta hirugarren itzulira arte elkarrekin joan dira —sei itzuliko lasterketa izan da—. Orduan, Pieterse pixka bat atzean geratu da, eta aurrez munduko txapeldun izandako Van Empel eta Brand geratu dira aurrean. Distantzia hartuz joan dira, eta garbi geratu da, okerrik ezean, bi horien artean egongo zela urrea. Bata bestea estutzen aritu dira, baina tarte handirik hartu gabe, eta indarrak gordez.

Bosgarren itzulian aldatu da kontua; Brandek itzuliaren erdibidean bizikleta ez aldatzea erabaki du, eta aldea atera dio Van Empeli —hamar segundoren aldea, denbora batez—. Hala ere, seigarren eta azken itzulian tarte hori murriztea lortu du Van Empel gazteak, eta erasoka hasi dira biak, aurrea hartzeko. Biek erabaki dute bizikleta ez aldatzea, eta estu-estu iritsi dira amaierara. Hala ere, errepidean sartu aurreko aldapatxoan, Brand desorekatu, eta aldapa erdian geratu da; eta, orduan, berdindu ezinezko aldea atera dio Van Empeli.

Azkenean, bakarrik iritsi da garailea, eta helmuga lasai asko pasatzeko tartea izan du.

Historia egiten

22 urte besterik ez du Van Empelek, baina jada hirugarrenez irabazi du Munduko Ziklo-kros Txapelketa; hirurak jarraian izan dira gainera, 2023an eta 2024an ere gailendu baitzen. Aurrez, 2021ean, 23 urtez azpiko txapelketa irabazi zuen, 18 urte zituela. Europako Txapelketan ere palmares ona du, hiru urre lortu baititu: 2022an, 2023an eta 2024an.

Gaurko garaipenari esker, beste koska bat egin du gora garaile handien zerrendan; izan ere, Laurence Leboucher txirrindulari frantsesak bi urrezko domina eta brontzezko hiru ditu, eta herbeheretarrak gainditu egin du. Laugarren postuan dago orain Van Empel, urrezko dominetan Sanne Cant belgikarrarekin berdinduta. Bigarren postuan dago Hanka Kupfernagel alemaniarra —lau urre ditu—, eta, tarte handiarekin, Marianne Vos herbeheretarra dago —zortzi urre ditu—, historiako ziklo-kros txirrindularirik onena.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Kazetaritza propio eta independentearen alde, 2025 amaierarako 3.000 irakurleren babes ekonomikoa behar du BERRIAk.