Eutsi edo astindu

Harmailan, inoiz baino jende eta giro gutxiago, eta zelaian, apenas lehiarik. Horra Euskal selekzioak eta Perukoak abenduaren 28an San Mamesen jokatutako futbol partidaren laburpena. Berehala dator galdera. Indarra galdu al du selekzioaren partidak?

 

LUIS MARI ELUSTONDO Euskadiko Futbol federazioko presidentea

«Segurtasun neurriengatik eta eguraldi iragarpen okerragatik ez zen bete San Mames»

Luis Mari Elustondok lehen aldiz ikusi du Euskal selekzioaren partida bat Euskadiko Federazioko presidente gisa —urtebete darama karguan—. «Pozik» dago Peruren aurkako partidaren ingurukoekin, eta balorazio «oso ona» egin du. San Mames bete ez izana azaltzeko, berriz, bi arrazoi eman ditu. «Eguraldi iragarpen okerragatik eta segurtasun neurriengatik ez zen bete». Ez du uste aurkaria Peru izateak eragina izan zuenik; haren iritziz, euskal selekzioaren jarraitzailearentzat garrantzitsuena ez delako aurkaria. Hori bai, aitortu du Peru espero baino jokalari apalagoekin etorri zela.

Aurkari hobe bat ekartzea «zaila» dela dio. Batetik, Gabonetako egunak «oso txarrak» direlako. Bestetik, selekzio indartsuenek «diru asko» eskatzen dutelako. «Ez da garaia Peruri halako bi ordaindu beharreko selekzio bat ekartzeko. Hori eginez gero, galera egongo legoke eta ezingo genioke dirurik eman oinarrizko futbolari». Agerikoa da galdera. Zer helburu du federazioak partidarekin? Ofizialtasuna aldarrikatu edo dirua lortu? «Lehen helburua gure nortasuna aldarrikatzea da. Nola? Partidak jokatuta, zenbat eta gehiago, orduan eta hobeto, eta zenbat eta hobeto antolatuak egon, orduan eta hobeto. Horrela egingo ditugu urratsak ofizialtasunerantz. Eta bide horretan dirua lortzen badugu, hobe».

 

MIKEL LABAKA Euskal selekzioko jokalari ohia

«Benetako borondatea balego, askoz ere hari gehiago mugitzeko aukera legoke»

«Tristuraz» ikusi zuen Mikel Labakak partida. Bertatik bertara ikusi zuen, gainera, San Mamesen izan baitzen. Gertatutakoak ofizialtasunaren gaian federazioak duen jarrerarekin zerikusia duela uste du. «Federazioak neurri zehatz batzuk ezarri dizkio bere buruari: estadioa bete; arazoak saihestu; ofizialtasunaren aldarrikapena neurrian egin, deseroso sentitu gabe, eta dirua bildu». Haren ustez, ofizialtasunaren aldarrikapena estadioa betetzeko «erabiltzen» du federazioak. «Ez da lehentasuna berarentzat, bestela, aspaldi egingo ziren behin eta berriz agindutako urratsak. Jendea jabetu da jokoaz, ofizialtasuna eskatu bai, baina gero ez dela ezer egiten, eta nekatu egin da, aspertu. Federazioa ofizialtasunaren aldeko puxika husten saiatu da berriro, baina oraingoan eskua joan zaio, eta gehiegi hustu du. Horren ondorio da San Mamesen ikusi zena: ikusle gutxi eta inoiz baino giro gutxiago».

Labakaren iritziz, «partidak jokatzea pausoak ematea da, zenbat eta gehiago, orduan eta hobeto, eta, ahal bada, Euskal Herritik kanpo, nazioartean». Baina argi dauka, halaber, «ezer gutxi» egin daitekeela lagunartekoak jokatuta bakarrik. Eta hor federazioak badu zer egin. «Federazioan benetan esandako borondate hori balego, askoz hari gehiago mugitzeko aukera legoke. Mugak borondatean daude, benetan errealitatean daudenak baino gehiago. Noski, mugak badaude, baina muga horiek jada etxean badaude, akabo». Horren adibide gisa azpimarratu du selekzioak EAEn bakarrik jokatu izana. «Selekzio honek zazpi lurraldeak ordezkatzen dituela onartzen badugu, zergatik ez jokatu Nafarroan edo Ipar Euskal Herrian? Zergatik ez zaio heltzen horri? Arrazoia sinplea da, horrek konfrontaziora eramaten duelako eta egoera horretan egun federazioan dagoen jendea deseroso sentitzen delako. Eztabaida saihestu nahi dute, eta partidak jokatu eta dirua bildu besterik ez egin».

Labakak ez du nahi bere iritzia federazioari eginiko kritika huts bat izatea. «Autokritika» egin behar dela dio. «Porrota da San Mames horrela ikustea, denon porrota. Egoera honetara iritsi bagara, denok hutsak egin ditugulako da. Horregatik hausnartu egin beharra daukagu, eta bildu, eta hitz egin, eta benetan ofizialtasuna nahi badugu, pauso errealak eman».

 

MARTXEL TOLEDO ESAITeko kidea

«Aspaldi esan genuen agortuta dagoela Gabonetako lagunartekoaren formatua»

ESAIT Euskal Selekzioaren Aldeko Iritzi Taldekoak ez ditu ustekabean harrapatu San Mames askogatik bete ez izanak. «Aspaldi esan genuen agortuta dagoela Gabonetako lagunarteko partidaren formatua. Zerbait berri behar da, jendeak ilusioa berreskura dezan, jendeak ilusioa galdu baitu, itxaropena, hori argi dago. Zergatik? Seriotasuna falta delako, seriotasuna aurkaria aukeratzeko orduan eta seriotasuna urratsak egiteko orduan. Borondatea duela dio federazioak, baina gero aitzakiak jartzen ditu. Urratsak agindu bai, baina gero ez ditu egiten». Martxel Toledo ESAITeko kidearena da azalpena.

Toledoren ustez, kontua da federazioarentzat partida «helburua» dela, eta ez ofizialtasuna lortzeko bidean urratsak egiteko tresna. «Federazioak nahi duena da ahal den diru gehien bildu. Kito. Eta hori lortzeko erabiltzen du partida eta ofizialtasunaren gaia, jendea erakarri, eta horri esker dirua lortzeko». Lau selekzioen arteko lehiaketa bat edo selekzio indartsu baten aurkako neurketa bat, horra ESAITen proposamenak. Ez dira baikor, halere. «Federazioak ez du nahi diru asko gastatu aurkari indartsu bat ekartzen, hori eginda irabazirik ez duelako izango. Eta dirua aipatuta, zergatik ez du bideratzen zati bat ofizialtasunaren alde pausoak emateko lanera?».

«Utzikeria» horrek «ondorioak» izan ditu Toledok dioenez. «Aldarrikapen eguna izan behar zena mozkor eguna bilakatu da».