Euren burua eskaintzen ari dira

Partida bat ez da nahikoa futbolarien balioa neurtzeko. Ez da zuzena egun bakar batean egindako beharraren arabera futbolari baten gaitasuna zehaztea. Onerako zein txarrerako, oso arriskutsua izan daiteke. Eta, zoritxarrez, sarri egiten da. Presaka bizi gara, eta momentuan gertatzen denak baino ez du balio. Horri aurre egiteko, teknikarien lana dago. Luzaroan egindako jarraipen zehatzaren arabera neurtzen dute jokalari bakoitzak eman dezakeena. Ez dira inguruak sortzen duen zarataren arabera aritzen. Hori bai, entrenatzaile bakoitzak bere gustuak ditu, eta horrek eragina izaten du.

Entrenatzaileek ez dute beti asmatzen. Hau da, ustez balio ez duen futbolariari halabeharrez aukera eman eta ezinbesteko bihurtzea ez da ezohiko kontua. Athleticen hainbat kasu daude. Besteak beste, Xabi Etxeita ia denboraldi oso bat egon zen Ernesto Valverderen aukeraren zain. Etsita. Bada, egun, bermatuta dauka lekua hamaikakoan. Mikel San Joseri ere ikaragarri kostatu zitzaion Joaquin Caparrosen konfiantza izatea… Beraz, baliteke Kike Solak edo Unai Bustinzak pisu gehiago izatea epe labur eta ertainean. Futbolean asko balio baitu izaten diren aukerak aprobetxatzea.

IAGO HERRERIN

Kopako finalerako prestatzen

Valverdek Vicente Calderonen egin zuen iraultzan, jarraitzaileak gutxien harritu zituen berritasuna izan zen Iago Herrerin (Bilbo, 1988). Entrenatzaileak esana zuen Espainiako Kopako finalerako gorputzaldirik onena izan aldera Ligan jokatzeko aukera emango ziola. Bada, norgehiagoka osoa jokatu zuen duela ez asko bere etxea izan zen zelaian —bi sasoiz jokatu zuen Atletico Madril B-n—. Herrerinen dohain nagusia bere buruan daukan konfiantza da. Lasaitasuna transmitizen du. Horrez gain, oinekin ondo moldatzen da. Gustuko du baloia jokatuta ateratzea. Horretaz gain, geldiketa erabakigarriak egin zituen. Gorka Iraizoz aurretik duen arren, Valverdek konfiantza dauka bere jokoan. Hori bai, ez dago argi Athleticeko ateak eragiten duen presioa jasateko gai izango zen. Ez baita gauza bera taldeko atezain titularra izatea edo ordezkoa. Gainera, atzetik indartsu dator Kepa Agirrezabalaga. Ligako azken hiru partidek eta Kopako finalak bere etorkizuna argitu dezakete talde zuri-gorrian.

UNAI BUSTINZA

Oldarkorra

Unai Bustinza (Bilbo, 1992) izan zen, inolako zalantzarik gabe, ustakabe nagusia hasierako hamaikakoan Calderonen. Valverdek Oscar de Marcos hegalez aldatzea erabaki zuen Bustinzari lekua egite aldera. Zeren bila hartutako erabakia izan zen? Erantzuna erraza da. Egun batzuk lehenago derbian jokalarien artean faltan bota zuen grina lortu guran zelairatu zuen. Jakinekoa baita ez dagoela zer eginik Atletico Madrilen kontra banakako lehietan euren pare jarri ezean. Eta indarra eta kemena izan dira Bustinzari nabarmendu diotena beheko mailetan jarraitu dutenek. Ez da kikiltzen. Futbolari bizia da, eta gustuko du kontaktua. Horregatik moldatu zen ondo partida itxi eta borrokatuan. Azken minutuan erakutsi zioten bigarren txartelaren erruz, ez du aukerarik izango Deportivoren kontra lehiatzeko. Baina Bustinzak asko dauka jokoan geratzen diren partidetan. Sasoi osoan hiru partida baino ez ditu jokatu. Beraz, Athleticen jarraitu behar duen edo beste bide bati ekitea komeni zaion erabaki beharko dute Lezamako teknikariek zein jokalariak. Andoni Iraolak agur esango dio Athletici, baina bere lekuan Eneko Boveda Eibarreko eskuin hegaleko atzelaria fitxatuko du klubak. Bestalde, bigarren taldeko Iñigo Lekue gazteak denboraldi-aurrea egiteko aukera izango duela dirudi.

KIKE SOLA

Ekinez egina

Kike Solak (Cascante, Nafarroa, 1986) ere aspaldi izan duen aukerarik onena izan zuen. Azken asteotan bera da Aritz Adurizen ordezkoa. Baina badirudi jokalariak egin dituen merituak baino gehiago Guillermo Fernandezek erakutsi duen maila eskasak aldatu duela entrenatzailearen iritzia. Konpromiso handiko partida zen, eta ez zuen bere balioa erakusteko aukerarik izan. Hala ere, askorentzat orain arte izan duena baino protagonismoa gehiago izan beharko luke taldean. Valverdek jarraitzen badu, hobe luke taldez aldatzea. Athleticen entrenatzaile aldaketa baldin badago, ordea, baliteke haren egoera aldatzea.

ANDER ITURRASPE

Maila onean

Ander Iturrasperen (Abadiño, Bizkaia, 1989) egoerak ez dauka zerikusirik aurreko hirurenarekin. Jakinekoa zen lehenago edo beranduago taldera itzuliko zela, baina uste baino gehiago itxaron behar izan du. Ahazteko moduko sasoia egiten ari da. Lehen erdian asko jokatu zuen, baina eskas aritu zen. Azken hileotan, berriz, min hartuta egon da. Baina taldeko izar nagusietako bat da, eta behar beharrezko da bere ekarpena. Calderonen neurketa ona jokatu zuen. Hortaz, prest dago Kopako finaleko erronkari aurre egiteko.