Estu-estu ere ez dago

«Engainagarria da erlojupekoa; ez nuen halakorik espero». Paperean agertzen dena bat baita, eta bertatik bertara ikusten dena bestea. Maillot gorriaren babesean, Joaquim Rodriguezek (Katuxa) baikor antzean igaro zuen atzoko eguna. Fabio Aruri (Astana) bi segundoren tartea aterata, kataluniarra liderraren maillota jantzita iritsi da Espainiako Vueltaren azken estutura. Lan zailak izango ditu, ordea, gaur, 38,7 kilometroko erlojupekoari aurre egin beharko baitio, Burgosen. Segundo bakarrera dauka Aru; 1.35era Rafal Majka (Tinkoff); 1.51ra Tom Dumoulin (Giant); eta 2.32ra Mikel Nieve (Movistar).

Igotzaile asko, eta Dumoulin, erlojupeko lanean espezialista handia. Hori da egoera. «Uste ez bezala, gogorrak dira lehen zortzi-hamar kilometroak». Baina liderrak barneratuta dauka Dumoulinek alde handia aterako diola. «Munduko onenetakoa da». 16:50ean abiatuko da azken txirrindularia, Rodriguez bera.