Aitor Estebanek batetik bestera hasi du bere ibilbidea EAJren EBBko presidente gisa, eta gaurkoan Tolosan (Gipuzkoa) izan da, «egungo gizartearen erronkak eta lehentasunak» hizpide zituela. Tartean, euskal selekzioen etorkizunari buruz ere galdetu diote, eta, Euskadiko Pilota Federazioaren ofizialtasunaz ari zela, adierazi du Espainiako Olinpiar Batzordeak dirua eskaini ziela beste federazio batzuei «Euskadiren kontra botoa emateko».
Zalantza egin du esan edo ez, baina isilune baten ostean, Estebanek segitu du hizketan: «Ikaragarria da». Adierazi du euskal selekzioa Nazioarteko Euskal Pilota Federazioan sartzea galarazteko presioak egin direla Espainiatik, eta PPren eta zenbait hedabideren jarrera kritikatu du. Jarraian, berriz, aipatu du iaz «urtearen erdialdera» egindako nazioarteko bilkura bat, eta esan du Espainiako federazioak dirua eskaini ziela beste federazio batzuei: «Dirua ordaintzen sekula joaten ez zirenei, joan zitezen eta Euskadiren kontra botoa eman zezaten».
Hilabete batzuk geroago onartu zuen Nazioarteko Euskal Pilota Federazioak Euskadiko Federazioa kide gisa, abenduaren 28an egindako bileran.
