Bederatzi jardunaldi falta ditu Bigarren Mailak helmugara iristeko, eta Eibarrek garbi ditu kontuak: sailkapenean 45 puntu dituela, bederatzi puntura ditu jaitsiera postuak, eta bederatzi puntura dauka seigarren postua, igoera fasea jokatzeko modua ematen duen postua, alegia. Lehiaketaren azken txanpa jokatzeko, sailkapenean ez gora ez behera begira geratzeko arriskua dute gipuzkoarrek, baina badute heldulekurik epe ertainera begira. Besteak beste, datorren denboraldirako zutabe sendoak eraiki nahi baititu Beñat San Jose entrenatzaileak. Joseba Etxeberriaren tokia hartu ondotik, donostiarrak sei partida zuzendu ditu Eibarko aulkian, eta emaitzak bikainak izan dira: hiru garaipen eta hiru berdinketa. Gainera, taldea ondo sentitu da zelaian.
Eibarko jokalari historikoetako bat da Mikel Arruabarrena (Tolosa, Gipuzkoa, 1983). Zazpi denboraldiz jokatu zuen bertan, eta giltzarri izan zen Lehen Mailarako igoera lortzeko. «Sarritan galdetzen didate zer taldetakoa naizen, eta Eibarrekoa naizela erantzuten dut. Bihotzean daramat taldea». Arruabarrena entrenatzaile lanetan ari da gaur egun, Beasainen (Gipuzkoa), Hirugarren Mailan, eta gertutik erreparatzen dio Eibarren ibiliari. «Partida guztiak ikusten ditut, eta berriz ere ilusioa piztu zaigu zaleoi. Azken urteetako kolpeen ondoren, ez da erraza izan egoera onartzea, hiru aldiz atzamarrekin ukitu baitugu Lehen Maila. Aurten ohi baino gehiago sufritzea egokitu zaigu, baina San Joserekin taldea itxuraldatu egin da. Uste dut Eibarrek ohiko nortasuna berreskuratu duela, eta baikor egoteko motiboak baditugu etorkizunera begira».
Arruabarrenaren esanetan, taldeari mesede egin dio entrenatzaile aldaketak, nahiz eta onartu oso zaila izango zela Etxeberria kargutik kentzeko hautua egin beharra. «Etxeberriarekin futbolean oso ongi jokatu zuen Eibarrek iragan denboraldian, baina sasoi honetan emaitzak ez ditu lagun izan, eta badakigu futbola zein krudela den. Etxeberriak joko erasokorra maite zuen, eta askotan behar baino gol gehiago sartzen zizkioten taldeari, atzeko aldean zuloak uzten zituelako». Aurkariek ere ikasia zuten Eibarren jokoa, Arruabarrenaren ustez. «Gainera, izenei dagokienez Eibarrek ez dauka joan den sasoiko talderik. Jokalari apalagoak ditu orain, kalitate baxuagokoak, eta garai zail bat etorri denean multzoak ez du gaitasunik izan egoera iraultzeko. Horregatik, entrenatzaile berri bat etortzeak on egin du».
«Txilen, Bolivian, Belgikan eta Saudi Arabian entrenatuta, toki guztietatik edan du San Josek; kultura handikoa da, jakintsua, gaztea eta ausarta»
MIKEL ARRUABARRENAEntrenatzailea eta Eibarko futbolari ohia
Dena den, San Joseren izenak ezustean harrapatu zituen Eibarko zale asko. Arruabarrena ez, ordea. «Ezagutzen dugu elkar. Bolivian zegoela hara eraman nahi izan ninduen, baina azkenean ez zen fitxaketa gauzatu. Esperientziarik ez dauka Espainiako ligetan, baina inork halako aukera bat irabazi badu, hark irabazi du. Futbol ezberdin asko ikusi du: Txilen, Bolivian, Belgikan, Saudi Arabian... Toki guztietatik edan du, kultura handikoa da, jakintsua, gaztea eta ausarta, eta, harekin, Eibarrek ohiko nortasuna berreskuratu du». Balorazio zehatz bat egiteko sei partida gutxi diren arren, dagoeneko taldeari irribarrea sumatzen dio tolosarrak. «Joko luzea baliatzen du batzuetan, baina baloia ukitzea ere gustatzen zaio. Asterik aste gauza berriak ikusten ari da, eta oso denbora gutxian estilo propio bat eman dio taldeari. Pazientzia behar dugu».
Bautistaren garrantzia
Krisi batetik ateratzeko lehen baldintza zera izaten da: atea hutsean mantentzea. «Psikologikoki jokalarien aldartea aldatzea ez da erraza izaten, eta San Josek lortu du dinamika txarra iraultzea. Oso gertukoa da, eta atsegina. Taldeari oso gol gutxi sartu dizkiote sei partidetan, eta baloiarekin gero eta gauza gehiago egitera ausartu da pixkanaka». Atzeko lerroan ez ezik, aurreko lerroan ere eraginkortasuna berreskuratu du taldeak, Arruabarrenaren ustez. Jon Bautistaren lana nabarmentzekoa izan da ildo horretan. «Bautista goitik behera aldatu da San Joseren etorrerarekin. Biek elkar ezagutzen zuten lehendik, Belgikan talde berean egon baitziren. Ikusten da ezin hobeki ulertzen dutela elkar, eta Eibarren aurrelari batek funtzionatzea oso garrantzitsua da».
Sasoi honetarako eta beste baterako kontratua dauka San Josek Eibarrekin. Horregatik, klubaren lehentasuna izan behar du epe ertainera begira zutabeak eraikitzeak, Arruabarrenak dioenez. «Etxeko jokalarien alde egiteko pausoa eman du klubak; besteak beste, bizpahiru gazte baditu-eta lehen taldean: Madariaga, Galarza… San Joseren gidaritzapean talde polita eratuko dute datorren sasoiari begira». Hori bai, oraindik aurten zeresana eman daitekeela gogoratu du tolosarrak. «Bederatzi puntu asko dira, baina bolada on bat harrapatuz gero, Eibarrek oraindik posible du mailaz igotzeko borrokan sartzea. Zaila izango da, baina ez da amore eman behar».
