Amaitu da Dusko Ivanovicek Baskonian egindako laugarren aroa. Arabako klubak gaur jakinarazi du entrenatzaile montenegroarrak ez duela jarraituko taldea entrenatzen. Azaldu duenez, negoziatzen aritu dira azken egunetan, baina ez dira ados jarri, eta «banatzea» erabaki dute. Klubak eskertu egin dio «profesionaltasuna eta konpromisoa», eta azpimarratu «arrastoa» utzi duela, eta beti izango dela «Baskoniako familiaren parte».
Ivanovicek iazko urriaren 30ean ekin zion laugarren aldiari Baskonian, Joan Peñarroya ordezkatuz. Haren esanetara, taldea oso gorabeheratsu aritu da: Espainiako lehiaketetan, ez zen sailkatu ez Koparako, ez ACB ligako kanporaketetarako —beti sailkatu zen haietarako—; Euroligan, berriz, final-laurdenak jokatu zituen bost urteren ostean.
Baskoniako kirol arduradunek Ivanovicen ordezkoa topatu beharko dute orain.
