Osagai asko ditu 2025. urte honek aspaldiko 1 Formulako Munduko Txapelketarik erakargarriena bilakatzeko. Bi arrazoi nagusi daude horreterako. Batetik, historiak erakutsi du araudia egonkortzen denean taldeek konbergentzia baterantz jotzen dutela, eta bereziki azken urtean gertatzen da hori. Bestetik, iaz hasi zen berdintasun hori nabarmentzen, eta 2023an Red Bullen agerturiko nagusitasun ukaezina ahaztea ekarri zuen horrek. Zazpi gidarik irabazi zuten, lau talde indartsuenetakoek: McLaren, Ferrari, Red Bull eta Mercedesekoak. Haien artean, baina, Sergio Perezek soilik ez zuen lehen posturik eskuratu, eta gabezia horren ordaina jaso zuen: kaleratzea. Ez da mexikarraren berririk ostikoa eman ziotenetik.
Eserleku dantza
Hamiltonen mugimenduak beste asko eragin zituen. Ferrarin bere lekua galdu ostean, Sainzek Williamsera egin du jauzi. Horrek Franco Colapinto argentinar gazte eta sutsua kanpora bultzatu zuen, eta Alpinen eman zioten aterpe. Jack Doohanen postua egoera larrian utzi zuen fitxaketa horrek, Mick Doohanen semea bada ere. Oconek, Alpineko barne giroa gaiztotzen hasi zela ikusi zuenean, Haas-erako bidea hartu zuen. Han bi gidariak aldatu dituzte. Aipatu Esteban Oconez gain, Oliver Bearman britainiar gaztea ariko da. Iaz Ferrarin eta Haasen tarteka aritu zen. Haasetik Saubererako bidea hartu zuen neguan Nico Hulkenbergek. 2 Formula oso modu sinesgarrian irabazi zuen Gabriel Bortoleto brasildarrak, eta hura izango da alemaniarraren parean. Gertutik erreparatu beharko zaio Andrea Kimi Antonelliri, Mercedesen Hamiltonen eserlekua hartuko duen italiarrari. Lan zaila, 18 urteko gaztearena.
Datorren urteari begira
Araudi aldaketa sakona dator 2026rako, eta taldeek ahalik eta baliabide gehien ezarri nahi dituzte lanean berandu baino lehen. Aurtengo lehen lasterketetan lortzen dituzten emaitzen arabera izango da kommutazio unea; ondo hasiz gero, eutsi egin nahiko diote bolada onari. Gaizki hasiz gero, aurtengo autoa berehala ahaztu, eta 2026koari begira hasiko dira buru-belarri. Aurrekontuak duen mugarekin, dagoeneko ezin dira bi programak indarrean mantendu. Noizbait aldaketa egin beharra dago.
Alonsoren 43 urteak
Oraindik bere 33. garaipenaren bila dabil espainiarra, eta Aston Martineko liderra da oraindik ere. Beti etor daitekeenaren itxaropenaz elikatuz, Adrian Neweyrengan jarrita daude haren jarraitzaileen desioak. Hamabi urte beteko dira bere azken garaipenetik, eta ez dirudi 2025 honetan berehala besterik iritsiko denik. Hala ere, haren bizkortasuna, lasterketa aztertzeko gaitasuna eta bultzada erabakigarriak izango dira taldea prest egon dadin Neweyren beste auto garaile baterako.
Ford, Audi, Cadillac eta Honda datoz
Izen handiak iritsiko dira datorren urtean. Ford motorgile gisa itzuliko da Red Bullen eskutik, nahiz eta izana baino gehiago izena izan: Red Bull Powertrains egungo motorren izen berria baino ez da izango. Audik, ordea, auto eta motor berriarekin lur hartuko du; Sauber taldea erosita, hori bai. Hondak bere motorrekin itzultzea erabaki du, baina oraingoan Aston Martinekin, eta ez hainbeste garaipen eta arrakasta eman dizkion Red Bullekin. Azkenik, Cadillaci berriki eman diote sarrera baimena. Horiek talde berria izango dira, hamaikagarrena. Ferrariren motor eta aldagailua izango dituzte bigarren talde amerikarraren ametsa bultzatzeko.
