Maria Erauntzetamurgil. IDK Euskotreneko jokalaria

«Denboraldi honetan aurrerapauso bat eman dugu talde jokoan»

Sei denboraldi pasatu dira Maria Erauntzetamurgil IDK-ko lehen taldera ailegatu zenetik, eta, lan isilari esker, jokalari garrantzitsu bihurtuz joan da pixkanaka. Erasoan bere ekarpena handitzea du helburu nagusi.

OSKAR ARAUJO.
ainara arratibel gascon
2020ko abenduaren 19a
00:00
Entzun 00:00:0000:00:00
Espainiako Koparako sailkatu eta gero, pozarren dira IDK Euskotreneko jokalariak, Maria Erauntzetamurgilek (Donostia, 1998) berretsi duenez. Bigarren itzuliari ekingo diote gaur, Gaskan, Bembibreren kontra (18:00).

Sasoiko lehen helburua lortuta, pozik egongo zarete, ezta?

Bai, oso. Helburua lortzeagatik ez ezik, taldeak daraman dinamikagatik ere, nahiz eta beti dagoen zer hobetua. Batez ere etxetik kanpoko partidetan, batzuetan horietan sartzea kostatu egin zaigulako, eta eskura genituen partida batzuk galdu egin ditugulako. Adiago egon behar dugu Gaskatik kanpoko partidetan. Baina, oro har, oso ondo ari gara. Etxean batez ere, betidanik izan dugun sendotasuna berreskuratu dugu

Ez du zerikusirik iazkoarekin, hasiera oso txarra izan baitzen, eta zuloan zineten. Non dago aldaketaren gakoa?

Lan egiteko moduan gauzak ez dira aldatu, ezta jokatzeko moduan ere. Azuk [Muguruza entrenatzailea] gauzak oso argi dituelako. Defentsa lan on batetik haziz doan talde bat gara. Lehiarik onenak defentsan ondo aritu garenean jokatuko ditugu. Nik uste dut aipatutako dinamikaren kontua dela. Irabazten hasteak indar handia eman zigun. Izan ere, aurreko sasoi hasieran partida asko galdu genituen oso alde txikiagatik. Azken minutuak kudeatzea kostatu egiten zitzaigun, eta batzuetan zorte txarra izan genuen. Porrotak pilatuz, konfiantza pixka bat galdu genuen, eta hori antzeman egiten da pistan: bai partidetan, bai entrenamenduetan. Izan ere, jokalari bakoitzak gehiago estutzen du bere burua. Sasoi honetan ez da hala izaten ari. Ikasgai handia izan zen aurreko sasoia. Orain, galduz gero, gaizki egindako gauzak ikusteko eta hausnartzeko baliatzen dugu. Baina, hori eginda, ez dizkiogu bueltak ematen. Alde horretatik, indartsuagoak gara. Gainera, etorri direnek ere beren ekarpena egin dute. Bakarkako jokaldien gainetik, talde jokoa da gure oinarria. Horretan aurrerapauso bat eman dugu.

Luzera begira duzuen hurrengo helburua liga titulurako kanporaketetarako sailkatzea da. Posible ikusten duzu?

Orain arte bezala jarraitzen badugu, eta aipatutako gauzak hobetzen baditugu, borroka horretan egon gaitezkeela uste dut.

Luze gabekoari dagokionez, berriz, gaur ekingo diozue ligako bigarren itzuliari, Bembibreren kontra. Zer traza hartzen diozu?

Sailkapenaren behealdean dago, baina ez gara fio. Azken partidetan hobeto ari da, eta puntu gutxiren aldeaz galdu ditu. Aurreko denboraldiarekin alderatuz, jokalari berri asko dituzte, eta egokitzen ari dira pixkanaka. Puntu asko sartzen dituzten bizpahiru jokalari ditu, eta ondo zaindu behar ditugu.

Zuen taldean aldaketa bat izan da aste honetan: Julia Gladkovak utzi egin du taldea, eta haren ordez Becca Hittner iritsi da. Zer ekarpen egin dezake?

Jaurtitzaile ona da, eta erasoko jokoan zabalago jokatzen lagun diezagukeela uste dut. Gainera, fitxaketa berriek beti ekartzen dute aire freskoa taldera. Bertan gaudenoi gure onena ematen segitzeko motibazioa ematen digu.

Taldean minutu gehien jokatu duten jokalarietan zazpigarrena zara. Zure orain arteko denboraldi onena da? Gustura ari zara?

Beharbada, bai. Oso gazte iritsi nintzen taldera. Jada seigarren urtea dut hemen. Beti sentitu izan dut Azuren konfiantza, eta horri gehitu behar zaio minutuak jokatzen ari naizela. Entrenatzailearena ez ezik, nire taldekideen konfiantza ere gero eta gehiago dudala sentitzen dut. Alde horretatik oso pozik nago; gero eta errotuago eta sendotuago sentitzen naiz taldean. Horrek konfiantza handia ematen dit.

Horren gaztea izanda, edukiko duzu zer hobetua. Zertan?

Beti nabarmendu izan naiz defentsako lanean, eta horretan segida bat izan nahi dut. Eta erasoan ere egin nahi dut nire ekarpena, puntu gehiago sartuz. Horrek jokalari osoagoa egingo nau, eta taldean gehiago egonkortzen lagunduko dit, puntu gehiago sartuz. Horretarako ari naiz lanean denboraldi-aurretik.

Zer gomendio emango zenioke maila gorenera iristea amets egiten duen jokalari bati?

Pazientzia izateko esango nioke, beregan sinesteko, eta sekula amore ez emateko. Momentu zailak izaten dira, ez baita erraza hasieran, minutu gutxi jokatzen baita. Baina, haien ametsa maila gorenean jokatzea baldin bada, lanean segitu behar dute, gogor, haien aukera iristen denean prest egoteko.

Lara Gonzalez, Ane Esnal eta zurekin batera, taldean harrobiko jokalari gehiago egotea gustatuko litzaizuke?

Noski. Harrobian lan oso ona egiten ari da kluba, eta egunerokoan gurekin entrenatzen duten jokalariak maila ona dutela erakusten ari dira. Baina ez da erraza, ligan lehiakortasuna gero eta handiagoa baita, berehalako errendimendua eskatzen baita, eta, esan bezala, gazteekin pazientzia izan behar baita.
Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Kazetaritza propio eta independentearen alde, 2025 amaierarako 3.000 irakurleren babes ekonomikoa behar du BERRIAk.