Athleticen ospakizunak Euskal Herriko mugak gainditu ditu. Bertako hedabideek eman zuten atzo ospakizunaren berri, baina nazioarteko hedabideen webguneetan ere izan du zeresana.
CNN Estatu Batuetako egunkariak gabarraren historia azaldu du, eta aipatu dute Athleticek harrobiaren alde egiten duela ere. «Athletic da munduko futbol talderik paregabeenetako bat. Futbolariak urrearen balioan eskualdatzen diren garaiotan eta futbolari superizarrak sortzeko garaiotan, taldeak lehiakor dihardu gaur egun ere».
Corriere Della Sera Italiako egunkarian eta Independent Erresuma Batuko egunkarian gabarraren bideoa txertatu dute, haien irakurleek ere ikus zezaten Bilboko itsasadarra zuri-gorriz gainezka. Ingelesek gehitu dute klubak «trauma» atzean utzi duela, eta «hainbeste espero zuten» garaipena lortu dutela.
La Razón, Mundo Deportivo, Marca eta Espainiako beste hedabideek gabarra eta Athletic izan dute hizpide. El País-en Athleticek «amestutako» kopaz hitz egin dute, eta gabarraren iritsiera «arranditsuaz».
Biharamuna
Ospakizunak arrastoak utzi ditu: Bilboko kaleak zaborrez beteta egon dira goizean zehar.
Gabarraren beste biharamuna. Oso zikina hau. Segurtasunean arreta handia jarri zen, baina garbitasunean ez. Aste Nagusi edo Santomas egun batekin alderatuta, komun eta zabor edukiontzi oso gutxi zeuden. #gabarra@berriapic.twitter.com/jsKSuwDgVu
— Imanol Magro (@Imagreto) April 12, 2024
San Mamesen inguruan ilarak daude jada Espainiako Koparekin argazkia ateratzeko. Gaur, bihar eta etzi izango dute zaleek garaikurrarekin argazkia ateratzeko aukera.
Espainiako Kopako garaikurrarekin argazkia ateratzeko ilara, San Mamesen. @berriapic.twitter.com/JPkXkn6FuK
— Imanol Magro (@Imagreto) April 12, 2024
