Arrakastatsua izan da beste behin Behobia-Donostia lasterketa. Astebururako eguraldi txarra iragarrita bazegoen ere, korrika egiteko giro paregabea izan da gaur. 27.700 korrikalarik emana zuten izena, eta eguerdirako 24.000tik gora helmugaratu dira. Chakib Lachgar errenteriarra eta Mireia Guarner kataluniarra izan dira helmugaratzen lehenak.
Lachgarrek 1.02.19ko denboran osatu du ibilbidea, eta hirugarrenez irabazi du lasterketa; 2019an eta 2023an irabazi zuen aurretik. Ruben Morales izan da bigarren, hamar segundora, eta Iraitz Arrospide hirugarren, hamabira.
Guarnerrek 1.13.54ko denbora egin du. Lorena Plano izan da bigarren, hamazazpi segundora, eta Maitane Melero hirugarren, 36ra. Azken hori izan da Euskal Herriko lehena.
Minutu bateko isilune bat egin dute abiatu aurretik korrikalariek, Valentziako tanta hotzaren eraginez hildakoak gogoan. Autonomia erkidego horretako 813 pertsonak emana zuten izena gaur Behobiatik Donostiara korrika egiteko. Lachgarrek Valentzian eta Palestinan hildakoei eskaini die garaipena, «errurik ez duten haur guztiei».
