Bilbo Basket FIBA Eurokopako finalean izango da. Zaila zirudien, finalerdietako joaneko partidan hemeretzi punturen aldeaz galdu eta gero, Dijonen (Frantzia). Are gehiago, gaur partida amaitzeko bost minutu eta erdi falta zirenean, soilik hiru punturen errenta baino ez zuelako: 66-63. Baina azken bost minutuetan 28-2ko partziala lortu dute. Ezinezkoa zirudiena posible egin dute, eta kirolean tarteka gertatu ohi diren ezusteetako bat gertatu da. Bilbotarrak 98-67 gailendu dira, eta finalerako sailkatu.
Hala, klubaren sorreraren 25. urteurrenean, Europan garaikur bat irabazteko aukera izango dute, eta ospakizunei amaiera bikaina eman. Klubaren ibilbidean bigarren finala izango da, 2010-2011ko denboraldian jokatutakoaren ostean. Oraingo honetan PAOK Salonika izango du kontrarioa, eta bi partidara jokatuko da, apirilaren 16an eta 23an. Joanekoa Bilbon jokatuko dute, eta itzulerakoa, Salonikan, Grezian.
Hemeretzi puntuko desabantaila iraultzeko, Bilbo Basketek ezinbestekoa zuen hasieratik bete-betean aritzea, eta hala egin du. Bikain irten da kantxara, eta 7-0 jarri da aurretik. Bizi jokatu du erasoan, eta oldarkor, defentsan. Frantziarrei, berriz, kostatu egin zaie erasoan asmatzea, batez ere hiruko marratik. Bost eta zazpi puntu arteko errenta horri eutsi diote bilbotarrek, eta azkenean zortzi punturen aldea atera diete lehen laurdenaren amaieran: 20-12.
Bigarrenari ere oso ondo ekin diote, eta hamar puntura igo dute abantaila. Lan erdiak eginak zituen emaitza horrekin. Baina zaila zirudien ezarritako erritmo bizi horri eustea, eta apur bat jaitsi denean, frantziarrak hobeto moldatu dira. Haien ahalmen fisikoa baliatu dute eraso estatikoan, jokaldi luzeak egin dituzte, eta, 6-0ko partzialari esker, lau puntura murriztu dute aldea: 26-22. Erasoan, gainera, Bilbo Basketekoek hainbat minutu eman dute asmatu ezinik. Marvin Jones eta Tryggvi Hlinason pibotak min hartuta egonda, bilbotarrak hiruko jaurtiketen bidez saiatu dira askotan puntuak lortzen. Baina ez dira fin aritu. Lehen bi laurdenetan hamasei ahalegin egin dituzte hiruko marratik, eta hiru baino ez dituzte sartu. Jaurtiketetako batzuk presaka egin dituzte.
Saskiratze errazak behar zituen Bilbo Basket, defentsako errebotea ondo zaindu, eta kontraerasoan bizkor atera. Baina nahi baino gutxiagotan lortu du, eta aldageletara bost punturen errentarekin joan dira: 35-30.
Lehen zatian ez bezala, bigarrenari hobeto ekin diote frantziarrek. Baina Bilbo Basketek bi hiruko sartu ditu bata bestearen segidan, eta zazpi puntura handitu aldea: 43-36. Frantziarrek ondo zaindu dute De Ridderren eta Pantzarren jarduna, eta horrek gutxitu egin ditu Bilbo Basketek kanporaketa iraultzeko zuen aukera.
Denbora aurrera zihoan, eta horrek Dijoni egiten zion mesede. Bilbotarrek beste martxa bat eman behar zioten neurketari hirugarren laurdenaren azken minutuetan, azkenengoan abaguneren bat izateko. Hala egin dute, eta hiru minutu eta erdi falta zirenean, laurden horretako alderik handiena lortu dute, bederatzi puntukoa: 54-45.
Azpimarratzekoa izan da minutu horietan Bassala Bagayoko gaztearen ekarpena. Maliko jokalariak 17 urte baino ez ditu, eta udan iritsi zen Bilbora. Etorkizun handia duela erakusten ari da, batez ere ausarta dela. Gaur horixe berretsi du. Baina pare bat defentsatan huts egin du Bilbo Basketek, eta Dijonek zazpi puntu egin ditu segidan: 54-52, laurdena amaitzeko minutu eta erdi falta zenean.
Miraria azken laurdenean
Azken laurdenari ekitean, lau punturen errenta besterik ez zuen Bilbo Basketek: 56-52. Baina berehala berdindu du partida Dijonek: 56-56. Miraria behar zuten bilbotarrek. Dena den, tinko jarraitu dute lanean; gutxienez partida irabazteko helburua zuten. Hala, denboraldi honetan Miribillan jokatutako FIBA Eurokopako partida guztiak irabaziko zituzten. Jokaldiz jokaldi aldea murriztuz joan dira. Hori lortu ahala, frantziarrak urdurituz joan dira, eta saskia are txikiagoa egin zaie. 66 puntutan geratu dira kateatuta. Bilbo Basketek balentria posible zela ikusi du. Miribilla infernu bilakatu da, eta, partida amaitzeko minutu eskas falta zela, 21 punturen errenta zuten bilbotarrek. Kanporaketa iraulia zegoen. Azken jokaldian, festa biribildu du Cazalonek.
