Bigarren urtez jarraian, Imanol Ansak irabazi du buruz buruko erremonte txapelketa, Endika Barrenetxea garaitu ondoren. Hernaniko (Gipuzkoa) Galarreta pilotalekuko harmailak beteta zirela, susperraldi bikaina izan du urnietarrak, eta ongi merezita egin da txapelaren jabe. Lehen erdi txukuna jokatu eta gero, bigarrenean ataka estuan izan da urnietarra; besteak beste, 16-23 joan baita atzetik. Ordea, saskitik pilota berria atera eta garaiz erreakzionatu du. Sakea eta abiadura baliatuta, 14 eta 3ko partziala sartu dio Barrenetxeari, eta ez dio ezertarako aukerarik eman. Txapeldun handi baten nortasuna plazaratu du Ansa II.ak, eta txapelketa osoko jokorik onena unerik erabakigarrienean egin du. Pozarren agertu da finala amaitu berritan. «Finala kasik galduta ikusi ondoren, pauso bat aurrera eman dut, eta kale edo bale jokatzea ongi atera zait. Izugarria da buruz buruko bi txapelen jabe egitea. Ametsik onenetan ere ez nuen halakorik pentsatuko».
Finala ez da ona izan, hotza eta erritmo motelekoa baizik. Lehen erdian urduri aritu dira bi pilotariak. Lehen tantotik errespetu handia azaldu diote elkarri, eta opariak egin dituzte bata bestearen atzetik. Egindako tantorik apenas izan den aurreneko hamar tantoetan. Sakean ere antzu aritu dira biak ala biak. Izerdia botatzen hasi ahala, Ansa II.ak neurria hobeto hartu dio lehiari, eta berehala hartu du aurrea: 4-2 eta 8-3. Aparte ezer egin gabe erdietsi du alde dotore hori. Orduantxe iritsi da Barrenetxearen susperraldia, finala erabat okertu baino lehen. Egunik onena ez zuela ikusita, lanari ekin dio, eta jarraipenak saria izan du: hamarna berdindu du neurketa. Hori gutxi ez, eta lan erdietara aurretik ailegatu da: 11 eta 15. Behetik gora egin du atzelariaren jokoak; Ansa II.arenak, berriz, behera.
Finaleko lehen atsedena orduantxe iritsi da, eta horrek mesede egin dio atzetik zihoanari. Izan ere, berriz finalean sartzea lortu du txapeldunak. Hortzak estutu eta tanto bakar batera hurbildu da: 16 eta 17. Dena den, eskarmentua eta esperientzia dituela erakutsi, eta berriz ere urrats bat aurrera egin du Barrenetxea IV.ak. Burutsu aritu da oso. Pilota errebotean jarri du ahal izan duen guztietan, eta bestela ezker hormaren laguntza baliatu du aurkaria estutzeko. Tartean, horma bikoz ere pare bat tanto eder egin ditu, eta 16-19koan zutik jarri ditu pilotazaleak. Ezinezkoa zirudien pilota bat jarri du txapa gainean, eta ondoren maisuki amaitu du tantoa. Horri guztiari esker, 16 eta 23 jarri da aurretik, eta guztiei pentsarazi die oso hurbil zuela txapela.
Ansa, izen handien artean
Ansa II.a ez da kikildu, ordea. Kontuak zail jartzen zirenean goitik behera egiteko joera hartu zuen garai batean, baina lehenengo txapela jantzi zuenetik beste pilotari bat bihurtu dela berretsi du urnietarrak. Presioari ezin hobeki aurre egin dio. Besteak beste, saskitik pilota berri bat atera eta dantzan jarri du aurkaria. Buruz buru nola jokatu behar den ezin hobeki erakutsi du. Batetik, sakeari etekina atera dio. Guztira zortzi tanto lortu ditu sakearen bitartez, eta horietatik bost azken txanpa erabakigarrian izan dira. Eta, bestetik, barruan dituen elektrizitatea eta sua kantxaratu ditu. Eskuinez epelak eman dizkio pilotari, eta denetariko tantoak egin ditu: atzean, horma bikoz… Ez dio ezertarako aukerarik eman Barrenetxea IV.ari.
Emozioak jantzi du finala azken txanpan, 24na berdinduta egon baitira bi pilotariak, eta azken tantoetan Ansaren joa nagusitu da nabarmen. Konfiantzaz jokatu du, ausart, eta merezita jantzi du txapela bigarren urtez jarraian. Balentria ederra lortu du, soilik bost pilotarik lortu baitzuten historia guztian bigarren urtez segidan buruz buru txapeldun izatea: Matxin II.ak, Ezkurrak, Zeberio II.ak, Urrutiak eta Urrizak. Orain, Ansaren izena ere batu da zerrenda horretara, eta hurrengo urteetan ere zeresana emango du txapeldunak.
