Beroketa lanak eginda

Baietz ematen du batzuetan, posible dela, AEBetako selekzioa estutzeko bidezidor batzuk badaudela. 0-2, 2-4, 4-6, 7-9, 10-13... Erabat indarrean ekin zion atzo Lituaniak Munduko Saskibaloi Txapelketako lehen finalerdiari. Defentsan izugarri estututa, eta erasoan AEBak jokoa lantzera behartuta, oso itxura ona eman zuen Lituaniak lehen bi laurdenetan. Baina, gehienetan gertatzen den bezala, hirugarren laurden harrigarria egin zuten AEBek (33-14), eta hortxe amaitu zen lehen finalerdia.

Ahal zuen guztian eutsiz eutsiz, AEBen kontraerasoek eta erasoko erreboteek zigortu zuten Lituania. 43-35 iritsi ziren atsedenaldira, Kuzminskasen hamabi puntuei esker artean Lituania bizirik zela. Baina 10-0eko partzial dotorearekin itzuli ziren estatubatuarrak aldagelatik, eta azken laurdenera bidean hasi ziren ohiko gozatuarekin. Datu bat nahikoa da horretaz jabetzeko. 33-14ko partziala lortu zuten AEBek hirugarren laurden horretan (76-49). Ordurako den-dena erabakita zegoela, defentsako lanak ahaztuta puntu zakua betetzera mugatu ziren bi selekzioak azken laurdenean (96-68).

Frantziak eta Serbiak jokatuko dute gaur bigarren finalerdia (22:00). Ezustean, Espainia utzi zuten kanpoan frantziarrek, eta Brasil serbiarrek.