Gutxi dira sona eta maila handieneko txirrindulariek irabazten ez dituzten World Tour lasterketak. Probarik onenak pribilegiatu gutxi batzuen barruti bilakatu dira. Haatik, aurten Euskal Herriko Itzulia agendatik kanpo utzi dute ahaltsuenek. Hots, tropeleko klase ertainak aukera bikaina izango du koska bat igo eta garaipenaren borrokan aritzeko. Hautagaiek lehia parekatu eta irekia edukitzea espero da. Maila aldetik, inor ez dago besteen oso gainetik, eta ibilbidearen funtsa, gainera, klimaxera bukaeran heltzea da. Taldeburuek ia egunero izango dute non mugitu, baina azken etapako mendate festan erabakiko da nork hartuko duen Juan Ayusoren (UAE) lekukoa. Iazko txapeldunak ez du parte hartuko.
Ibilbide bihurria
Arrate, hiru aldiz
Oro har, antolatzaileek azken urteetako ildoari eutsi diote ibilbidea taxutzerakoan. Alabaina, badira ñabardura adierazgarri batzuk. Lasterketa, ohiko legez, erlojupeko batekin hasiko da, baina ez da menditsua izango, laua baizik. Espezialistek etekina atera ahalko diote Gasteizen hasi eta amaituko den hamasei kilometroko saioari. Aldapa nabarmenik ez denez, haizea izan liteke oztopo nagusia. Biharamunean, lasterketako etaparik luzeena eta errazena lehiatuko da, Iruñea eta Lodosa artean.
Hortik aurrera, gaiztakeriak egiteko ibilbide aproposa izango dute txirrindulariek. Jolasgura dutenak hirugarren etapan has litezke mugitzen, sei mendate igoko baitituzte Zarautz eta Beasain artean. Gaintzako eta Lazkaomendiko igoerek min egingo dute beharbada. Laugarren etapan, berriz, Izua igoko dute Markina-Xemeingo helmugara iritsi aurretik. Orduan igoko dute Arrate lasterketan lehen aldiz. Bosgarren etapan ere gora eta behera ibiliko dira ziklistak, Gernikara bidean. Bukaera tranpatia izango du: igoera gogor bat topatuko dute azken txanpan, baina ez da puntuagarria izango.
Bukaera klasikoa izango du Itzuliak, Eibar inguruan. Ibilbidean, hori bai, badira berritasun batzuk. Trabakuatik bi aldiz pasatuko dira, eta Karabieta igoko dute Gorlaren ordez. Etapa bakar bat ere ez da mendate batean bukatuko, baina guztira 23 igoera gainditu beharko dituzte.
Lau handiak faltako dira
Iazko erorikoak gogoan
Ayusok baino hutsune handiagoa eragingo dute itzulietako espezialista onenek. Gaur egun, Tadej Pogacar (UAE), Jonas Vingegaard (Visma), Primoz Roglic (Red Bull) eta Remco Evenepoel (Soudal) dira indartsuenak hainbat egunez lehiatzen diren lasterketetan, eta horietako inor ez da azalduko astelehenean Gasteizko irteeran. Pogacar 2021ean izan zen azkenekoz Itzulian, eta aurten harbideetako monumentuak ditu begiz joak. Beste batean beharko du. Vingegaardek, Roglicek eta Evenepoelek faborito gisa abiatu zuten iazko aldia, baina bakar batek ere ez zuen lasterketa amaitzerik izan. Hirurak laugarren etapan erretiratu ziren, Oletan behera beste hainbat ziklistarekin batera erori ostean.
Bada, sasoi honetan Kataluniako Voltan lehiatzea hobetsi zuten Roglicek eta Vingegaardek —daniarrak kale egin zuen azkenean, Paris-Nizan lurrera jausi ondoren—. Evenepoelek, berriz, ezbeharra izan zuen denboraldiaurreko entrenamendu batean, eta Itzuliaren ondotik hasiko da berriz ere lasterketak lehiatzen. Haren taldekidea da Mikel Landa, eta aurten etxetik ikusiko du etxeko lasterketa. Hark izkin egin zion iazko Itzuliko istripu jendetsuari, baina lepauztaia hautsi zuen biharamunean.
Kalitatea eta kantitatea
Ondo hornitutako taldeak
Onenak ez dira ariko, baina horrez ez du esan nahi ariko direnak onak ez direnik. Ezta hurrik eman ere. Kalitate handiko txirrindulariz josita egongo da Itzuliko tropela. Sailkapen nagusiaren lehiari dagokionez, talde batzuek hautagai bat baino gehiago izango dute. Taktikak eta estrategiak garrantzi handia izan ohi du Itzulian, eta hori horrela izanik, mesedegarria da taldearen barruan zenbait alternatiba edukitzea.
UAE taldea, doan tokira doala, beti ibiltzen da garaipenen arrastoan, eta baliteke datorren astean Joao Almeidaren, Isaac del Tororen eta Brandon McNultyren esku uztea aginte makila. Almeida ez da ondo moldatzen Itzulian ohikoak diren igoera labur eta pikoetan, baina alde du lehen eguneko erlojupekoa. McNultyk ere etekina lor lezake erlojuaren aurka, baina ez da fidagarria sailkapen nagusien borrokan. Del Torok, berriz, bigarren sasoia baino ez du profesional gisa; edozertarako gai da, ordea.
Red Bull taldeak ere badu non aukeratu: litekeena da zeresana ematea Florian Lipowitzek, Daniel Felipe Martinezek eta Aleksandr Vlasovek, Maxim Van Gils eta Giulio Pellizzari ahaztu gabe. Visma taldean, Sepp Kussek hartuko du lema, eta, hark huts eginez gero, Ben Tulettek agertu beharko luke. Movistarren, antzera gertatuko da Enric Mas eta Pablo Castrilloren artean; beteranoa izango da liderra, baina badaezpada, erne ibiliko da gaztea. Astanan, berriz, sasoi hasierako sentipen onei eutsi nahiko diete Clement Champoussinek eta Harold Tejadak.
Mattias Skjelmosek, berriz, bere gain hartuko du ardura osoa Lidl taldean. Iaz sailkapenaren buru iritsi zen Eibarko etapara, eta hirugarren izan zen azkenean. Jaycoren liderra Eddy Dunbar izango da, baina ez du bermerik ematen. Guillaume Martin (Groupama) eta Warren Barguil (Picnic) ere ohorezko postuetatik aparte izango dira ziurrenik.
Etxean bezala, inon ez
Eskarmentua lagun
Itzulia da Ion Izagirreren (Cofidis) lasterketa kutuna, bai atxikimendu sentimentalari dagokionez, baita emaitzei begiratuta ere. Ormaiztegiarrak txapela jantzi zuen 2019an, eta beste bost alditan igo da podiumera: lau bider izan da hirugarren, eta behin, bigarren. Urteko gorputzaldirik onentsuena apirilean izan ohi du, eta ondo datorkio aurten lasterketak izan dezakeen gidoi bizi eta irekia. Gainera, eskarmentu handieneko hautagaia izango da. Pello Bilbaok (Bahrain) ere alde izango du esperientzia, baita Gernikan, haren jaioterrian bukatuko den etapa ere —ibilbidea diseinatzen parte hartu zuen—. Lau aldiz izan da Itzuliko hamar onenen artean, baina oraindik ez du podiuma zapaldu. Santiago Buitragorekin partekatuko du taldearen lidergoa.
Sailkapen nagusiaren borrokatik aparte, badira distira egin dezaketen beste zenbait euskal txirrindulari. Alex Aranburu (Cofidis), adibidez, talde berrian estreinako garaipena lortzen saiatuko da. Jada badaki zer den Itzulian besoak altxatzea: bigarren etapa irabazi zuen 2021ean. Urko Berradek (Kern Pharma), berriz, beste garaipen handi batekin egiten du amets, iazko Vueltan etapa bat zakuratu ondoren. Baliteke Jon Barrenetxea (Movistar) ere etaparen batean agertzea. Igor Arrietak (UAE), ordea, bestelako zeregina izango du: taldeburuen sostengu izatea, hain zuzen. Iazko Itzulian bikain aritu zen talde lanean. Aurtengo lasterketan 22 euskal txirrindulari lehiatuko dira, azken orduko aldaketarik ez bada.
Altxorraren bila
Puntako ehiztariak
Goi mailako arerioak izango dituzte etapen ehizan aritu nahi duten euskal herritarrek. Esaterako, Romain Gregoire (Groupama) txinpartatsua eta Ben Heally (Education) nekagaitza. Ez dirudi sailkapen nagusiaren lehian sartuko direnik, eta hobe horrela. Ikuskizun handia eman dezakete etapen peskizan, Marc Hirschik (Tudor) eta Thibau Nysek (Lidl) bezalaxe. Flandriarrak bihar abiatuko du errepideko sasoia, Miguel Indurain sari nagusian, neguan lokatzetan nabarmendu eta gero. Axel Laurence (Ineos) eta Axel Zingle (Visma) ere aintzat hartu beharreko ziklistak izango dira bukaera azkarra duten etapetan. Soudal taldean, ikusteko dago zer maila ematen duten Ethan Hayterrek eta Maximilian Schachmannek; biak etapa irabazle izanak dira Itzulian.
