ESKUBALOIA. COVID-19aren pandemiak eraginda txapelketa etenda egon arren, Super Amara Bera Berako bulegoetan buru-belarri ari dira datorren sasoiko taldea osatzeko lanean. Duela egun batzuk iragarri zuten Imanol Alvarez entrenatzailearen kontratu berritzea. Bada, atzo jakinarazi zuten Alba Menendez kapitainari beste denboraldi baterako luzatu diotela kontratua. Hala, hamabigarren denboraldia egingo du Donostiako taldean.
Menendezek 300 partidatik gora jokatu ditu, eta 669 gol sartu. Taldeko historiako golegilerik onenen artean zazpigarrena da. «Oso pozik» agertu zen segitzeko aukera izateagatik. «Eskertzekoa da hamabigarren denboraldiz erreskadan klubak nigan konfiantza berrestea. Eskolan eskubaloian jokatzen hasi nintzenean, ez nuen sekula pentsatuko hainbeste sasoi egingo nituenik hemen. Espero dut azkena ez izatea». Zarauztarrak onartu zuen asteak aurrera joan ahala «gero eta zailago» ikusten duela txapelketa berriz hastea.
Bera Beran ariko da beste urtebetez Alba Menendez
Iruzkinak
Ez dago iruzkinik
Ordenatu
