San Mamesi neurria hartua dio Osasunak. Gaur ez du irabazi, baina zapuztu egin ditu hirugarren postura gerturatzeko Athleticen asmoak. Partida hasieran aurretik jartzeko aukerak ere izan dituzte gorritxoek, baina bigarren zatian zuri-gorriak izan dute gola gertuen. Dena den, ez dute aukera askorik sortu, eta puntuak banatu dituzte bi taldeek (0-0).
Ikusleentzat, bederen, ez da partida gogoangarria izan. Lehen minutuetan zenbait korner izan ditu alde Osasunak, eta, horietako batean, Torrok baloia zutoinera bidali du buruz.
Horren ostean hobera egin du etxeko taldeak, eta, Osasunak atzera egin behar izan duen arren, Athletic ez da eroso ibili. Izan dituen gol aukeretan, gainera, sendo erantzun du Aitor Fernandezek. Nico Williamsek aukera pare bat izan ditu, eta urrutitik egindako jaurtiketa bat ere bai Yurik.
Bigarren zatian are nabarmenagoa izan da Athleticen kontrola, baina alferrik. Kamuts aritu dira zuri-gorriak, eta gogotik ordaindu dute ia, azken minutuetan Ruben Peñak Osasunaren gola sartzeko aukera izan baitu.
Sailkapen nagusian laugarren da Athletic —53 puntu ditu—, eta hamalaugarren, Osasuna —34 puntu—.
