Finalera iritsi, eta postu bikaina lortu du Ander Martinez de Rituerto jauzilari tolosarrak Calin (Kolonbia) jokatutako Munduko Atletismo Txapelketan. 5,25 metroko jauzia eginda, bosgarren egin du Real Sociedad taldeko jokalariak 20 urtez azpikoetan, Tolosaldeko Atariak berri eman duenez. Lehenago ere berak zeukan Araba, Bizkai eta Gipuzkoako marka, 5,23 metrotan, eta bere burua gainditu du orain, marka berria ezarriz.
1.500 kirolari baino gehiago aritu dira Calin 20 urtez azpiko Munduko Atletismo Txapelketan. Bihar amaituko txapelketa, baina, oraingoz, Espainiako selekzioak lortu duen posturik onena eskuratu du tolosarrak. Pertika jauzian, lehen hiru postuetan sailkatu zirenek 5,45 metroko langa gainditzea lortu zuten.
Ekainean lortu zuen Martinez de Rituertok Munduko Txapelketarako sailkatzea, 5,20 metroko jauzia eginda. Uztailean, berriz, urrea eskuratu zuen Espainiako txapelketan.
