Partida eder batez gozatzeko aukera izan genuen Nafarroa Arenan bildu ginenok: giro bikaina, tanto borrokatuak, emozioa... hutsak ere egin zituzten pilotariek, noski; baina final batek inguruan sortzen eta gainean jartzen duen zama zenbatekoa den aintzat hartzen badugu, bai lau protagonistak, bai beren ingurukoak, pozik egoteko moduan daudela esango nuke. Batzuek binakako hirugarren txapela lortu zuten, eta besteek etorkizunean jokatuko dituzten finaletarako (jokatuko baitituzte) esperientzia pilatu.
Kantxa barruan gertatu zenaz hainbat analisi tekniko zein taktiko egin daitezke: gorriek erakutsitako ofizioa, urdinen ahala, hasierako 7 eta 1 hark nola baldintzatu zuen partida, Artolak bukaera aldera agertutako ausardia hasieratik erakutsi ote beharko zukeen... Finala bukatu ondoren frontoiaren kanpoaldean zeuden zaleen ahoetan entzun zitezkeen kontuak. Nik, aldiz, begirada igandean gertatutakoetan jarri ordez, distantzia handiagoa hartu, fokua ireki eta bikote gorriak azken bi urteetan bizitakoan jarri nahiko nuke; asko izan baitira txapelketa honetan jaso dituzten laudorioak, baina baita aurreko bi urteetan entzun behar izan dituzten kritikak ere. Izan ere, kirolak (edo kirolzaleek eta kazetariek, agian?) gero eta joera handiagoa du joko bolada ez hain ona pasatzen ari den kirolaria egurtzeko, ulertzeko eta samurtzeko baino. Eta iruditzen zait, bai Beñatek, bai Josebak, ondo ezagutu dutela kirolaren alderdi beltz hori.
Gogoan dut duela urtebete-edo zera esan zidala pilotazale batek: «Ezkurdiak eta Rezustak eman dute eman beharrekoa, beheraka doaz, Ibai. Datorren urtean Aspek txapelketan sartu ere ez ditu egingo. Ikusiko duzu». Nik, artean pilotaren mundutik pixka bat aldenduta nengoenez, harrituta eta mesfidantza puntu batez hartu nituen hitzok; halako izana eta izena duten pilotari handi bi horren erraz akabatutzat jotzea ariketa arriskutsua izan bailiteke. Akordatuko al zen atzo pilotazale hura orduko bere hitzez?
Jokoaz haragoko beste argudio bat ere entzun izan dut azken pare bat urtean Josebari eta Beñati lotuta: adinarena, zahartu egin direla. Benetan? 33 eta 32 urte baino ez dituzten eta sasoi bete-betean dauden gazte bi, zaharrak? Gaur egun bizi dugun, edo bizi gaituen, kapitalismo eta kontsumismo basatiak zaharrak azkarrago zahartzea ekarri du eta une oro gauza berrien bila aritzera darama jendea; eta, dirudienez, pertsonei ere hasi zaie teoria hori eragiten.
Hala ere, azken urteetako harrabots horren guztiaren eta bateko zein besteko kritiken gainetik, lanean jarraitu dute Josebak eta Beñatek. Eta, aurten, txapelketa bikaina jokatuta, merezimendu osoz irabazi dute txapela. Zorionak eta bejondeizuela, gazteak!
