Europa aldatzen ari da. Eta ez, ez da bakarrik herrialdeak erosten ari diren armengatik. Donald Trump Etxe Zurira itzuli zenetik, mundu osoan etengabeko aldaketak eragiten ari da. Batzuk nahita eragindakoak dira, eta besteak albo kalteak dira. Era batera edo bestera, Ameriketako Estatu Batuak inoiz baino hedatzaileago daude. Badirudi kolonialismora itzuli garela. Hori bai, haien modura, kolonialismo onik balego bezala.
Fenomenoak
NBAk Europarako jauzia eman nahi du 2026-2027 denboraldian, FIBAren eskutik. Nahi baino gehiago, eman egingo du. Estatubatuarrak horrelakoak dira. Adam Silver NBAko komisiodunak lehen asmoak jakinarazi zituen iragan astean: hamasei taldez osatutako liga bat nahi dute, hamabi talde finkorekin, eta aldatuz joango diren beste laurekin. Hau da, kontinente bakoitzeko bi formatuak uztartu nahi dituzte: NBAko liga itxia, eta ustez irekiak diren Europako txapelketak. Azken horietan ligako emaitzak hartzen dira kontuan, parte hartu ahal izateko. Euroligaren inguruan hitz egitean, asko aipatzen den gaia da. Baina beste txapelketa askotan ere gehiago dira gonbidapenak, ligan egindako lan onari esker lortutako sailkapenak baino.
Eta bide beretik jo nahi dute lehiaketa berri honekin. Hain zuzen ere, munduko beste fenomeno handienetako batekin lerrokatu nahi dute saskibaloia: futbolarekin. Futbol taldeak atzean dituzten taldeak nahi ditu NBAk. Azken batean, merkatu berriak dira, jadanik masa sozial eta ekonomiko oso handia dutenak: Real Madril, Bartzelona, Bayern... Win-Win, haiek esaten dutenez. Denek irabazten dute; ikusteko dago, ordea, saskibaloiak irabaziko ote duen.
«Betiko Euroligarik onena» jokatzen ari den honetan, kolokan jarri dute txapelketaren etorkizuna. Bazirudienean liga erregularreko formatuarekin bete-betean asmatu zutela. Baina bizitzak erakusten dizu momentu batetik bestera gauzak goitik behera aldatzen direla. Euroliga sortu zuten taldeetako askok NBAren aldeko apustua egingo dute, zalantza barik. Diruak agintzen du.
Berpizkundea
Eta testuinguru horretan, non da Baskonia? Futbol talde bat dauka atzean? Bai. Euroligako fundatzaileetako bat da? Bai. Adam Silverrek eskatzen duen bezala, pabiloi berritua dauka? Bai. Baina hala eta guztiz ere, etorkizuna beltz jarri zaie gasteiztarrei. Alaves ez da Bartzelona, eta ez du izan nahi. Josean Kerejetak aurreratu zuen beste 10 urterako lizentzia sinatua dutela Euroligarekin. Baina, orain, badirudi ezer gutxirako balioko duela akordio horrek. NBAk ez du tradizioa errespetatuko, ezta hiri txikiago batzuetara goi mailako saskibaloia eramateko asmorik erakutsiko ere.
Euroligako 25. urteurreneko ospakizunetan Kerejetak berak aitortu zuen «berpizteko» garaia zela. Arabarren gaur egungo errealitatea bestelakoa da, ez dira egokitu. Honek begiak zabaltzeko balio dezake. Kolpea litzateke, handia, baina agian beharrezkoa.
Matematikak
Kolpea jaso zuen ere Bilbo Basketek iragan astean Dijonen, Frantzian, FIBAren Eurokopako finalerdietako joanekoan. Errealitateak ez du barkatzen. Gaur (20:00, ETB4) itzulerako partida jokatuko dute Miribillan. Hemeretzi puntuko desabantailarekin ekingo diote partidari. Iragan sasoian, Legia Varsoviaren aurka, desabantaila berdinarekin ekin zioten itzulerako partidari, eta gai izan ziren buelta emateko. Baina bi jokalari garrantzitsu gabe aritu beharko dute bilbotarrek: Marvin Jones eta Tryggvi Hlinason. Min hartuta daude, eta erabakigarria izan daiteke. Izan ere, frantziarrek zerbait badute, ahalmen fisikoa dute.
Miribillako infernua berreskuratzeko garaia da. Kanporaketa iraultzeko tokiren bat badago, hori Bilbo Arena delako. Sasoi honetan, Europan, ez dute partidarik galdu etxean. Bilbo Basketek bertsiorik onena ematen du zaleen aurrean. Hemeretzi puntu asko dira, gutxiago izan zitezkeen, baina taldeari ahaztu egin omen zitzaion joan-etorriko formatuan puntu bakoitzak duen garrantzia. Ez da erraza izango. Partida hasierak berebiziko garrantzia izan dezake, konfiantza hartzeko edo galtzeko. Hain zuzen ere, galtzeko ezer barik atera behar dira bilbotarrak, dena ematera. 2013an jokatu zuten haien lehen eta azken finala Europan. Lokomotiv Kubanen aurka izan zen, Belgikako Charleroi hirian. 12 urteren ostean bigarren aukera bat dute. Horretarako, 20 punturen aldeagatik irabazi besterik ez dago, matematikak argiak dira. Hori bai, horrek ere ez du balioko NBAren txapelketan parte hartzeko.
