Espainiako Koparen astea berezia da beti. Azkenaldian, tamalez, euskal taldeentzat gero eta gutxiago. Euroliga geratzeko gai diren txapelketa bakarrak dira herrialdez herrialde jokatzen diren Kopak, pentsa. Tradizio hutsa da. Kanaria Handiak hartuko du gizonezkoena, etzi hasita, eta Zaragozak emakumezkoena, martxoaren 20tik 23ra. Euskal talde bakarra ariko da: Lointek Gernika Bizkaia.
Bidea
Topiko hutsa da Kopan edozer gerta daitekeela dioen hori. Partida bakarra da. Txapelketa desberdina. Aurrekoak ez du balio, ezta dinamikek ere. Beste urte batez Real Madrilek eta Bartzelonak ez lukete elkarren aurka jokatuko finalera arte. Hori ere tradizioa omen da. Ostegunean, Unicaja-Joventut eta Bartzelona-Tenerife kanporaketak jokatuko dira, eta, ostiralean, Real Madril-Manresa eta Valentzia-Kanaria Handia.
Bi talderik indartsuenak dira Real Madril eta Bartzelona, nahiz eta biek jokalari garrantzitsuak faltako dituzten. Baina garaikurra altxatzeko hautagai nagusiak dira. Joan Peñarroyak ez ditu emaitza onak lortu. Gainera, Nico Laprovitola eta Jan Veselyr ez dira arituko. Dena den, kalitaterik ez zaio faltako Kataluniako taldeari. Dario Brizuela donostiarra horren adibide.
Real Madril ere gorabeheratsu dabil sasoi honetan, baina dagoeneko ACBko liderra da. Gainera, ondo baino hobeto indartu da. NBAtik Bruno Fernando eta Dennis Smith Jr. fitxatu ditu. Dirua ez da inoiz arazoa izango Valdebebasen. Horrelakoetan, Chus Mateo txandakatzeak asko laburtzearen aldekoa da. Horretarako ez du inolako arazorik, batez ere bigarren zatietan. Are gehiago kontuan hartuta Koparen ostean FIBA Leihoak daudela, eta ez dutela partidarik jokatuko otsailaren 27ra arte.
Analisiak
Horrez gain, batez ere azken jardunaldian, sailkapeneko goialdeko taldeek zalantzak sortu dituzte. Lehen aipatu bezala, agian ez dute ezertarako balio dinamikek, baina beti da hobea Kopari garaipen batekin heltzea. Agerikoa da bigarren itzuliek ez dutela zerikusirik lehenengoekin. Beheko taldeek asko estutzen dute, beharra dute, eta gorriak eta bi pasatu behar dira haiei irabazteko. Unicajak Lugon galdu zuen asteburuan, Kanaria Handiak etxean Andorraren aurka, Joventutek luzapena behar izan zuen Coruñari irabazteko, eta Tenerifek azken segundoan hartu zuen mendean Murtzia. Bestalde, Bartzelonak aise menderatu zuen Valentzia Fontetan.
Argi dago Kopan aritu diren taldeek dagoeneko burua Kanaria Handian zutela. Azken batean, Kopako prestaketa ez da aste berean egiten, aste askoko lana da. Tradizioaren erakusgarri, taldeek mimoz lantzen dituzte partidak, xehetasunik txikiena ere garrantzitsua baita. Lehen itzuliaren amaieran, adibidez, Koparako sailkatu diren zortzi taldeen arteko neurketetan, Manresak dauka balantzerik onena: bost garaipen eta bi porrot, Real Madrilekin berdinduta. Baina Kopa ez da gauza bera, hasteko kantxa neutral batean jokatzen delako. Gainera, Kataluniako taldeak etxean lortu zituen bost garaipenak eta kanpoan bi porrotak.
Formatu aldaketa
Tradizioa izateari utzi diona NBAko Izarren Gaua da. San Frantziskok hirugarrenez hartuko du ostiraletik aurrera. Atzean geratu dira gaueko ordu txikietan esnatzeko garaiak. Ez du merezi. Adam Silverrek ere badaki, eta berritasunen bila dabil etengabe. Aurten goitik behera aldatu du formatua. Zortzi jokalariz osatutako lau taldek finalerdiak jokatuko dituzte, eta irabazleek final handia. Hiru talde bozketa eta hautaketetatik atera dira, eta laugarrena talde gazteen partidatik aukeratuko dute. 40 puntura heltzen den taldeak irabaziko du partida.
Dagoeneko ez dakite zer egin Izarren Gauari aspaldiko garrantzia emateko. Asmakizunak egiten dituzte. Horrelakoetan onenetakoa da NBA. Produktua saltzen ondo baino hobeto dakite. Horretarako edozer egiteko gai dira. Baina arazoa ez da hori, errelebo falta baizik. Ez dago LeBron James, Stephen Curry, Kevin Durant eta halako izarren ordezkorik. Gauza batengatik edo bestearengatik, Shai Gilgeous-Alexanderrek eta Ja Morantek ez dute berdin saltzen. Eta estatubatuarrek beren figurak nahi dituzte. Horretan ere tradizionalak dira.
