mikel reina
Hirukotik

Martx(o)an

2025eko martxoaren 11
05:00
Entzun 00:00:0000:00:00

Baskoniak errusiar mendi baten moduan aurkeztu zuen 2024-2025eko denboraldia. Emozioz beterikoak izaten dira halakoak, eta normalean onerako, horrelako lekuetara emozioak nahi dituztenak joaten dira eta. Horrez gain, gorabeherak etengabeak izaten dira, pixkanaka egiten baita gorantz eta ziztu bizian beherantz. Komunikazio sailak ezin izan zuen hobeto erakutsi aurtengo denboraldia, bete-betean asmatu zuen, baina ez aurreikusten zuen bezala.

Egiari zor, gorabeherak normalak dira, denboraldiak luzeak dira eta denetarako denbora izaten da: bolada onetarako eta ez hain onetarako. Hemen kontua betikoa da: bolada onak ahalik eta gehien luzatzea eta txarrak ahalik eta laburrenak izatea. Baskoniako zaleak etengabeko errusiar mendi batean bizi dira, emoziorik ez zaie falta. Hori bai, sentsazioak askotarikoak dira, eta ez denboraldian, partida bakar batean baizik.

Hain zuzen ere, martxoarekin batera martxan jartzen da denboraldiko faserik erabakigarrienetako bat. Denboraldiak batzuetan ez baitira soilik txapelketetako azken faseetan erabakitzen. Aurretik badago denbora asko, nahi baino gehiago batzuetan, esateko sasoi bat ona edo txarra izan den.

Ahaztezina

Euroliga izan ezik, gainontzeko Europako txapelketak kanporaketetan sartuta daude. Bilbo Basketek, adibidez, bihar aurre egingo dio Turkiako Tofas Bursaren aurkako itzuliko partidari. Bilbotarrek ere gorabeherak izan zituzten joaneko partidan eta nahi baino alde txikiagoa lortu zuten. Hamabi punturen aldea ondo dago, baina, bereziki Turkian, baliteke abantaila hori txikiegia izatea. Ahaztezina da Lointek Gernikak duela urte batzuk Kukurovaren aurkako kanporaketan bizi izandakoa: edozertarako gai dira turkiarrak, are gehiago markagailuan atzetik daudela ikusten badute.

Bizkaitarrek buruz gogor egon beharko dute batez ere. Horrelakoetan, duzun abantailan pentsatzea erabateko hanka sartzea izan daiteke; partida irabazteko asmoz atera behar dute, ez dute beste aukerarik. Tofasek, gainera, jokalari bikainak ditu denbora tarte txikian puntu asko sartzeko. Beraz, Jaume Ponsarnaurentzat garrantzitsua izango da partzial handirik ez jasotzea, ahalik eta arinen etetea goranzko bidea hartzen dutenean.

Formatuak

Txapeldunen Ligan eta Eurokopan ere kanporaketak jokatzen hasi dira. Ibon Navarroren Unicajak, adibidez, hemezortzi partida jarraian zeramatzan irabazita Txapeldunen Ligan, baina Galatasarayren aurka galdu egin zuten joaneko partidan, azken segundoan. Non? Turkian. Malagan bestelakoa izan daiteke. Behintzat, bi partidako kanporaketak dira. Eurokopan jokatu izan balute, kanporatuta egongo ziratekeen. Hain zuzen ere, partida bakarreko formatuari eutsi nahi izan diote, hil edo bizikoari.

Martxoa kanporaketen hilabetea baita, eromenarena. Igandean hasiko da jaia. Kanporaketa bakoitza zehaztuko dute Selection Sunday deitzen duten ekitaldian. Hau da, konferentzietako txapeldunez gain, koadrantea osatuko duten gainontzeko taldeak aukeratuko ditu batzordeak, guztira 68. Horregatik, lehen aipatu bezala, batzuetan garrantzitsua izaten da martxoa heldu baino lehen etxeko lanak bideratuta edukitzea. Hiru asteko etengabeko eromena hasiko da, partidak ia egunero, bata bestearen atzetik, eta milioika ikusle izango dira pantailara —eta haiek egindako aurreikuspenetara— begira.

Emakumezkoetan ere kanporaketak jokatzen ari dira, baina oso aurreratuta daude. Euroligan, Seiko Finaleko formatu berritzaileko taldeak zehaztuta daude, eta, Eurokopan, finala erabakita geratuko da ostegunean. Horregatik, Araskik joan den aste bitarteko partidaren data aldatu behar izan zuen. Ferrol da aurtengo ezusteko handiena. Finalerdietan daude eta Asvel faboritoari 31 punturen aldearekin irabazi zioten joaneko partidan, Malatan. Frantziako taldeak Roberto Iñiguez gasteiztarraren Girona kaleratu zuen final-laurdenetan. Lino Lopez entrenatzaileak joko estilo oso definitua dauka, lehen begi kolpean ikusi daitekeena. Berezia ez ezik, arraroa ere bada, inor gutxik jokatzen baitu horrela; taldeei asko kostatzen zaie defentsa egokitzea.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Kazetaritza propio eta independentearen alde, 2025 amaierarako 3.000 irakurleren babes ekonomikoa behar du BERRIAk.