Murtzia benetan existitzen da. Baten batek asteburu honetan kokatu du mapan, eta emakumezkoen saskibaloi talde bati esker izan da: Jairis. Espainiako Kopa irabazi du, Zaragozan (Espainia).
Nor
Bere lehen parte hartzean lortu du garaikurra Alcantarilla (Espainia) herriko taldeak. Ez dago gehiago eskatzerik. Gainera, goi mailako hiru aurkariren kontra nagusitu da. Ez da erraza hiru egunean Valentzia Basket, Girona eta Perfumerias Avenida mendean hartzea. Halaber, nagusi izan dira minutu askoan. Aina Ayuso izendatu dute Kopako jokalaririk onena, finala bera Lou Lopez Senechal hegalekoak irabazi bazuen ere. 27 puntu sartu zituen.
Azken hiru urteetan talde diferente batek altxatu du garaikurra aldiro. Duela bi urte Zaragoza izan zen, iaz Valentzia Basket, eta aurten Jairis. Talde berriak sartu dira jokoan. Hori bai, Avenidaren kasua bestelakoa dela esan dezakegu. Harreman berezia dauka txapelketarekin, nahiz eta hiru urte diren irabazten ez duela. Kopa jokoan izan den azken hamalau aldietatik hamabitan sartu da finalean Salamancako taldea.
Baina zelan lortu du Murtziako taldeak garaipena? Hasteko, azaldu beharra dago Jairis ez dela edozein talde. Hozono taldea dauka babesle nagusi, eta aurrekontu handia dute. Agian ez Zaragozaren, Gironaren, Avenidaren edota Valentziaren parekoa, baina oso handia da hala ere. Hozonok, adibidez, Kopa bera babestu du. Baten batek txarto pentsatu nahi izango du. Baina Kopara sasoirik onenean heldu den taldea da, Gironarekin batera. Hala, haien arteko finalaurrekoa luzapenean erabaki zen. Ez zegoen beste modurik.
Nori
Horrez gain, emakumezkoen saskibaloiak bestelako pauso bat eman du aurtengo Kopan. Partida guztiak ikusgarriak izan dira, emozioz beteak, iazkoak ez bezala. Ez da partida txar bat bera ere egon. Denek izan dute zerbait. Kantxatik kanpo ere aurrerapausoa eman da. Harmailetan giro bikaina egon da. Gernikaren eta Gironaren arteko partida izan zen txapelketako lehena. Normalean, jende gutxien biltzen duen neurketa izaten da. Baina jendetza bertaratu zen. Bakoitzak bere taldearen alde egiten zuen, eta behin hura kanporatuta, partida bakoitzean baten alde egiten zuten.
Baina bestelako eremuak ere nabarmendu nahi izan dituzte: produktuak saltzekoa, hain zuzen ere. Lehen aldiz, zaleen gune bat jarri dute pabiloiaren aurrean, eta egunero bete egin da partiden aurretik eta ostean. Elkargune bat izan da, eta gaur egun horrelako ekintzek asko saltzen dute. Hobekuntza bat partidak bertan emateko aukera izango litzateke, sarrerarik gabe geratu direnek ere bertan ikusi ahal izateko. Lehen aldiz, halaber, taldeen kalejira egin zuten larunbatean, hirigunetik pabiloiraino. Zortzi talde parte hartzaileen elastikoez gain, bestelako taldeen kamisetak ere ikusi dira, eta Koparen izaera hori are gehiago zabaldu da horrela. Gizonezkoetan baliatzen den formatu bera da, bai, baina oraindik emakumeengana heldu gabea zena. Eta horrelako ekinaldiek asko indartzen dute kirola. Parte hartzaileetako askok nabarmendu dute hori.
Zerk
Produktua bera garrantzitsua da, baina hura inguratzen duena ere funtsezkoa da: bilgarria. Saskibaloiak erritmoa dauka, baten batek errepikapenekin kentzen badio ere. Gaur egun, gainera, erritmo hori are eta biziagoa da. Horri lotuta, nabarmentzekoak dira asteburuko ACB ligako bi partida: Valentzia Basket-Coruña eta Unicaja-Real Madril.
Erritmoaren kontua beste maila batera eramaten du Pedro Martinezen taldeak. Bestela ezin daiteke ulertu 40 minutuko partida batean 127 puntu sartzea; zelan-eta 35 asistentzia banatuta, gainera. ACBko errekorra berdindu zuten. Eromen hutsa izan zen. Ez dira atzean geratzen Unicajaren 23 hirukoak, ligan inoiz sartutako gehien. Nork zuen aurreko marka? Bada, Valentziak. Baina, harrigarria badirudi ere, Ibon Navarroren taldeak ez zuen garaipena lortu. Hirukorik garrantzitsuena Tyson Carterrek sartu zuen. Azken segundoan izan zen, eta horri esker irabazi zuen Real Madrilek. Hori baita gaur egungo saskibaloia, erritmoa eta hirukoak, urruneko jaurtiketak edo uztai azpikoak, ez dago erdibiderik.
