mikel reina
Hirukotik

Aldatu ez(in) direnak

2025eko martxoaren 4a
05:05
Entzun 00:00:0000:00:00

Badaude aldatzen ez diren gauzak. Denbora aurrera joaten da, baina badaude aldatzen ez diren zenbait gauza. Beste batzuk, ordea, garatuz doaz. Denbora kontua izaten da askotan; beste askotan, berriz, ez.

Oporretan, hobe

Baskoniako zaleak, adibidez, lasaiago bizi izan dira azken bizpahiru asteetan. Espainiako Kopako etenaldia izan zen aurrena —Baskoniarentzat ohitura bilakatu da azken denboraldietan atseden hartzea astebete horretan— eta FIBA Leihoena ondoren. Hala, entrenatzeko izaten ez duten denbora izan dute gasteiztarrek. Baina geldialdiaren osteko lehen bi partidek erakutsi dute inflexio puntu izan zitekeena ez dela hori izan. Hau da, Pablo Lasoren taldeak aurreko arazo edo bide orri berdinak errepikatzen ditu.

Denboraldi honetan bada askotan errepikatu den dinamika bat: hasiera berdindu bat, partzial handi bat aurka, partidan sartzeko ahalegin handia eta, azkenik, egindako esfortzuarengatik partidari buelta emateko ezina. Zaleek ondo baino hobeto ezagutuko dute patroi hori; esperotakoa izan daiteke. Jokoan ere sendotasun falta bera islatzen du taldeak, aurrean zein atzean. Badirudi arazo batzuek konponbiderik ez dutela. Errotuta daudelako izan daiteke, aurreikusi daitezkeenak, eta konponbidea dutela pentsaturik onartu zirenak.

Nahi beste aitzakia jar daitezke, baina Baskonia denboraldiko bere garairik garrantzitsuenean dago. Zaila da erregulartasun minimo bat lortzea taldea gai ez bada hiru garaipen jarraian lortzeko. Horrela ezinezkoa da. Euroligan, adibidez, benetan maldan gora jarri zaio kanporaketen aurrekoetan sartzea. Zazpi jardunaldi falta dira ligaxka amaitzeko, eta hiru garaipenera dauka hamargarren postua. Puntuen aldea irabazia dio Real Madrili, baina Bartzelonari, aldiz, ez. Horretarako, etziko Zalgirisen aurkako lehia erabakigarria izan daiteke. ACB ligan, berriz, 21 jardunaldi jokatu eta gero, arabarrak oraindik ez dira kanporaketak jokatzeko postuetan egon, hau da, ez dira lehen zortzi postuetan egon.

Arnasa

Hain zuzen ere, zortzi da Bilbo Basketentzako orain zenbaki magikoa. Zortzigarren garaipena lortu zuten Gironaren aurka. Lorpen garrantzitsua da, balio bikoitza izan zuelako igandekoak. Garaipenak berak asko balio du sailkapeneko behealdea nola dagoen ikusita, baina puntuen aldea berreskuratzea are eta garrantzitsuagoa da. Sei punturen aldeaz galdu zuten bilbotarrek Fontajaun, eta Miribillan hamahiru punturena lortu zuten. Bi garaipeneko tartea dute jaisteko postuekiko, eta ondo bideratuak dituzte lehia zuzenak. Granadari hamabi punturen aldeaz irabazi zioten; Coruñari, 21en aldeaz, eta Andorrari, zortziko aldeaz. Lehen bi aurkarien aurka, gainera, oraindik etxean jokatuko dute.

Gainera, Jaume Ponsarnauk zuzentzen duen taldeak Tofasen aurka jokatuko du bihar FIBAren Eurokopako final-laurdenetan. Indarberrituta, bizkaitarrek aurkari —eta batez ere bidaia— gogorra izango dute turkiarren aurka. Entrenatzaileak ostera ere ondo banatu beharko du denbora  jokalarien artean. Malcom Cazalonen fitxaketarekin, mugimenduak egin behar ditu Ponsarnauk. Zaila izango du igandekoa bezalako Ruben Dominguezen partidekin. Behintzat, arnasa hartu dute.

Miraria

Arnasa hartzea gakoa da bizirik irauteko, horretan ere badaude moduak eta moduak. Emakumezkoen liga da horren adibide. Ardoik ia-ia agur esan dio gorenean segitzeko ametsari. Lau garaipen lortu ditu bakarrik, eta sei porrot daramatza jarraian. Azken postutik ateratzeko hiru garaipen behar ditu, puntuen aldeak aurka dituelako. Baina batez ere azkenaldiko zenbait partidatan erakutsi duena da kezkagarria, batez ere etxetik kanpokoetan. Zazpi jardunaldi falta dira liga amaitzeko, eta nafarrek mirari bat behar dute kategoriari eusteko.

Zazpi garaipenekin, arnasa behar bezala hartu ezinik jarraitzen dute, berriz, IDK-k eta Araskik. Irabazten dutenean, aurkari zuzenek ere irabazten dute, eta ezin dira beheko postuetatik aldendu. Igandean, gainera, elkarren aurkako euskal derbia dago Josean Gaskan. Joaneko partidan nagusitasunez irabazi zuten  arabarrek: 24 puntuz. Beraz, puntuen aldea ez litzateke jokoan egon beharko. Hori bai, biek ala biek  lehen itzulian galdu egin zuten Celtaren aurka. Garaipen bakarrera duten taldea da, eta jaisteko postuetan dagoen aurrena. Bihar bada partidarik emakumezkoen ligan.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Kazetaritza propio eta independentearen alde, 2025 amaierarako 3.000 irakurleren babes ekonomikoa behar du BERRIAk.