Osasunako zaleek ezingo dituzte Nacho Vidal eta Darko Brasanac ikusi finalean, baina hamaikako sendo eta gogotsu bat zelairatzeko aukerarik ez du faltako Jagoba Arrasate entrenatzaileak. Atean, segurua da Sergio Herrera. Atzealdean, Aridane, David Garcia eta Juan Cruz ere ia segurutzat eman litezke hasierako hamaikakoan. Moncayola ere bai, baina leku diferenteak har ditzake zelaian, eta hamaikakoa osatzeko apustuaren arabera mugitu dezake Arrasatek. Aurrean, berriz, Ante Budimir hasieratik aterako ote duen izan liteke beste galdera. Abde eta Chimy Avila ia seguruak dira. Kike Barja izan liteke beste aukera. Aukera horien arabera, Torro, Moi Gomez eta Aimar Orozekin osatuko du erdiko aldea. Hau gerta liteke final handia hasieratik jokatzen hasiko den hamaikakoa:
Luka Modric. Hori da gaurko partidarako galdera nagusietako bat Real Madrilen. Osatu da jokalaria, eta deitu egin du Ancelottik, baina ez da segurua haren egoera, eta aulkian hasiko du partida, ia seguru. Real Madrilek Txapeldunen Ligako finalerdia jokatuko du asteartean, eta zalantza hori ere ibiliko du entrenatzaileak buruan. Ferland Mendy ere ez da osatu finalerako; Ceballosek edo Txuamenik har dezakete haren lekua. Atzeko lerroa osatzeko, berriz, ikusi beharko da noren alde egingo duen gaur: Militao edo David Alaba. Nacho Fernandezen lekua, berriz, Eduardo Camavingak har dezake. Aurki argituko dira galdera horiek guztiak. Bitartean, hauxe da Ancelottik zelairatu dezakeen hamaikakoa:
