Lehenbizi, aurkezpena; ondoren, pilota aukeraketa. Pixkanaka, Lehen Mailako buruz burukoa jokatuko duela barneratzen ari da Beñat Senar (Ataun, Gipuzkoa, 2001). «Gozatzen ari naiz», dio.
Lehen aldiz ariko zara Lehen Mailako buruz burukoan. Zer sentitzen duzu?
Poza. Niretzat, aukera ederra izan zen atarikoa jokatzea, eta, aprobetxatu egin nuen. Orain, Elordiren aurka jokatuko dut. Hark du presioa, txapeldun izandakoa baita. Nik, ordea, ez dut batere, eta ahalik eta partidarik onena egiten saiatuko naiz; ea irabazten dudan.
Duela bi urte eskas izan zen Elordi txapeldun. Non zinen zu orduan?
Etxean ikusi nuen final hura, telebistan. Elordi inoizko boladarik eta sasoirik onenean zegoen. Beldurra ematen zuen haren aurka jokatzeak. Ea oraingoan ez duen halako bolada harrapatzen.
Pentsa zenezakeen bi urte eskas geroago haren aurka jokatuko zenuenik?
Ezta pentsatu ere. Afizionatuetan nenbilen orduan. Handik bost hilabetera debutatu nuen profesionaletan. Lehen lau hilabeteak gogorrak izan ziren, baina, pixkanaka, gero eta emaitza hobeak lortu nituen. Ondo aritu nintzen udan, eta, gero, binakakoari ekin nion Iosurekin [Eskirozekin]; izugarri lagundu zidan, eta konfiantza handia hartu nuen. Sekulako kolpea izan zen lehen ligaxka lider bukatu eta gero finalerako ez sailkatzea. Baina kanpoan geratu eta biharamunean esan zidan enpresak atarikoa jokatuko nuela. Ilusio ikaragarria piztu zidan. Izugarri eskertu nuen.
Sufritu egin zenuen profesionaletako hastapenetan?
Bai. Lehen zortzi partidak galdu nituen, eta horrek zalantza eragin zidan, ea nire tokia zen. Baina, gero, hobera egin nuen. Orain, gozatzen ari naiz, baina, hemen ez dago lasaitzerik.
Zure garairik onenean zaude?
Bai. Uztailetik hona oso emaitza onak lortzen ari naiz, eta gustura nabil. Eta, orain, buruz buruko nagusia jokatuko dut. Ametsa da debutatu eta urte eta erdi eskasera halako partida bat jokatzea.
Atarikoa jokatzeko ez ezik, enpresak aukera eman zizun binakako txapelketan hirutan ordezko lanak egiteko. Ezustekoa izan zen?
Bai, handia. Iosu eta biok oso ondo ari ginen. Hala ere, sekula ez nuen pentsatuko partida horiek jokatuko nituenik. Ondo aritu nintzen. Jonekin [Mariezkurrenarekin] jokatzea sekulako abantaila da, baina bolada onean nengoen, eta horrek konfiantza eman zidan nire jokoa egiteko. Sekulako aukera izan zen.
«Lehen zortzi partidak galdu nituen, eta horrek zalantza eragin zidan, ea nire tokia zen. Baina, gero, hobera egin nuen»
Enpresa pozik dago zurekin.
Baietz esan daiteke. Nahiz eta emaitza onak lortu, ez dago zure esku aukerak izatea, baina, zorionez, enpresak eman dizkit; oso eskertuta nago.
Urte eta erdi daramazu profesionaletan. Asko aldatu zaizu bizitza?
Ez. Eguneroko bera dut, familiarekin, lagunekin, Ataunen.
Lehen zortzi orduz egiten zenuen lan Ampo enpresan. Horri eusten diozu?
Ez. Orain, Zaldibian [Gipuzkoa] egiten dut lan, Euler enpresan, eta hiru orduz egiten dut lan. Malgutasun handia dut. Oso gustura nago.
Zertan egin duzu hobera?
Konfiantza gehiagorekin ari naiz ezkerrez bukatzen, eta, kantxan egoten ikasi dut. Emaitza onek ematen dute konfiantza, eta ni emaitza onak lortzen ari naizenez, konfiantza gehiagorekin nabil, eta, gauza gehiago egitera ausartzen naiz.
Defentsan zenuen gehien hobetzeko. Ari zara hobetzen?
Horretan ari naiz. Hemen erasoan ia denek asmatzen dute, eta estu hartzen zaituzte. Pilota azkarrago dator, eta denbora gutxiago dago pentsatzeko. Hobetu egin dut defentsa, baina asko dut hobetzeko oraindik ere. Gustura nago izan dudan garapena ikusita.
Zertan dago alderik handiena?
Afizionatuetatik profesionaletara, presioan. Berehala sumatzen duzu gauza serioa dela eta afizioa zena lanbide bilakatu dela. Astea asteburuko partidaren mende dago; hari begira aritzen zara bete-betean. Bigarren mailatik lehenengora, berriz, alde handia dago abiaduran; askoz azkarrago dator pilota.
Partidaren bat gogoratzen duzu bereziki?
Azkenekoa esango nuke, atarikoa, izan duen garrantziagatik, gauza handia baita Lehen Mailako buruz burukoa jokatzea.
Partida horren garrantzia txiki geratuko da Elordiri irabazten badiozu. Zer egin behar duzu ondo hari irabazteko?
Nire jokoa egin behar dut: eskuinarekin gozatu, haren hanketara jokatzen saiatu, pilota gurutzatu, eta une erabakigarrietan asmatu. Buruz burukoan norbaitek bere jokoa egiten badu, oso zaila da hari irabaztea.
