Erabaki da: Peio Etxeberria-Zabaletak eta Altuna III.a-Martijak jokatuko dute Binakako Txapelketako finala. Bolada bikainean daude bi bikoteak, Aspekoak biak, eta parez pare arituko dira. Altunak eta Martijak gaur erakutsi dute sasoiko daudela, neurketa erabakigarri horretan 22-9 irabazi baitiete Artolari eta Imazi. Hasieratik izan dira nagusi markagailuan.
Faboritoa zen Aspeko bikotea, baina kantxan erakutsi behar da hori. Onartu dute erronka. Altunak sekulako erakustaldia eman du; pilota guztiak ongi jo ditu, sekulako abiada eman die, eta une bakoitzean jakin du partidak zer behar zuen. Denera, hamalau tanto egin ditu. Artolak eta Imazek ezin izan dute ezer egin. Lagundu du Martijak ere; geroz eta hobeto dago atzelaria, berak aitortu duen moduan.
Norgehiagoka ez da ikusgarria izan. Dena den, Eibarko (Gipuzkoa) Astelena pilotalekua bete duten (1.100 lagun) pilotazaleek egindako txapelketa ederra aitortu diete galtzaileei. Artolak eta Imazek sendotasun handia erakutsi dute. Gaur, ordea, erabakigarria izan da Altunaren eta Martijaren esperientzia.
Finala Nafarroa Arenan izango da, Iruñean, bi aste barru. Altuna eta Martija han izan ziren txapeldun 2022an. Atzo, Zabalak eta Zabaletak erraz irabazi zieten Jaka eta Eskirozi, Labriten: 22-13.
