Atzo Usoa Ostolaza (Laboral Kutxa) eta gaur Alex Aranburu (Movistar). Bi euskal herritarrek irabazi dituzte errepideko Espainiako txapelketak. San Lorenzo de El Escorialen (Espainia) jokatu dira biak, eta gaurkoan Aranburu bakarrik helmugaratu da. Nagusitasunez gailendu da Ezkiokoa. Oier Lazkano (Movistar) izan da bigarren, iazko txapelduna.
Helmugarako hogei kilometro falta zirela jo du erasoa Aranburuk, eta ezin izan dio inork jarraitu. Sasoi betean dago, duela astebete Belgikako itzulian etapa bat irabazita erakutsi zuen moduan. Lazkano 52 segundora helmugaratu da, eta Jesus Herrada (Cofidis), hirugarren sailkatua, 58ra.
Mikel Landak (Soudal-Quick-Step), ihes egiteko zenbait saiakera egin ondoren, bosgarren amaitu du. Movistarrek ondo lotua izan du egun guztian zehar.
