Ahotsa dardarka eta malko artean. Halaxe iragarri du Tati Garmendia Bera Berako kirol zuzendariak taldeko bi erreferenteren agurra: Alba Menendezena eta Esther Arrojeriarena. Denboraldi amaieran erretiroa hartuko dute klubaren urrezko aldiko bi ikurrek. Taldeko kapitainak dira gaur egun, eta eredu: bai pistan, eta baita handik kanpo ere.
«Ez nuen nahi momentu hau irits zedin, baina banekien egunen batean iritsiko zela. Alba eta Esther bi jokalari errepikaezin izango dira; arrakastaz betetako garai bat markatu dute. Zaila izango da partidak ikustea elastikoetan 8a eta 3a egon gabe». Hunkituta esan ditu hitzok kirol zuzendariak, eta korapiloa eztarrian aritu dira jarraian bi jokalariak, elkar goratuz eta ingurukoei eskerrak emanez. Taldekide guztiak izan dira agerraldian.
Klubaren historian letra larriz gordeta geratuko dira bi kapitainen izenak, eta ez da gutxiagorako. Menendezek hamaseigarren denboraldia du Gipuzkoako taldean, eta Arrojeriak, hamahirugarrena. Taldearen zutabe izan dira, eta klubak bizitako aldi loriatsuaren testigu. Palmaresa bete-beteta utziko dute: Bera Berarekin liga bederatzi aldiz irabazi du zarauztarrak, zazpi aldiz Espainiako Kopa, eta beste bederatzi aldiz Superkopa.
Espainiako Kopa bat gutxiago baino ez du, berriz, usurbildarrak —Bera Berak Arrojeriaren debutean irabazi zuen historiako lehen liga, 2012-2013ko denboraldian—. Eta maila pertsonalean, zer esanik ez: klubaren historiako golegile nagusietan bosgarrena da. 370 partidatan, 1.003 aldiz zulatu du atea.
Ibilbide oparoari ginga jartzeko aukera dute oraindik, gainera, ligako hamargarren titulua irabazita. Amaiera hori dute amets, Arrojeriak esan duenez: «Europako ibilbidea oso polita izan da, baina bukatu da. Orain buru-belarri jarrita gaude ligan. Uste dut taldeak gaitasunak sobran dituela; hemendik aurrera, helburua partida guztiak irabaztea da».
«Pila bat disfrutatu dut denboraldi honetan, eta disfrutatzen ari naiz, baina nire etorkizunari begira hartutako erabakia da, ondo hausnartutakoa»
ESTHER ARROJERIABera Berako jokalaria
Denboraldi «historikotzat» dauka Bera Berak aurtengoa. Europako Ligako final-laurdenetara iritsi da, eta gertu izan du lauko finalerako sailkatzea. Penaltietan kanporatu zuen Alemaniako Blomberg-Lippe taldeak. Biek uste dute eskubaloia uzteko «garai ona» dela. Hala aitortu du Arrojeriak: «Pila bat disfrutatu dut denboraldi honetan, eta disfrutatzen ari naiz, baina nire etorkizunari begira hartutako erabakia da, ondo hausnartutakoa. Erizaina naiz, eta sentitzen nuen nire bizitza bide horretatik eraman nahi nuela. Bestalde, momentu on batean utzi nahi nuen eskubaloia: bai fisikoki eta bai joko aldetik. Uste dut denboraldi ideala izaten ari dela; ez bakarrik klub bezala lortutakoagatik; pertsonalki ere oso ondo sentitzen naiz».
Azken sasoietan erretiroa hartzeko ideia buruan izan duela adierazi du, berriz, Menendezek: «Eskubaloiaz gain, beste lan bat ere badut. Azken urteetan biak uztartzeko gai izan naiz, baina agian denboraldi hau gogorragoa egiten ari zait. Europako multzokako fasera iritsitakoan, zera esan nuen: 'Hau zen azken urteetan nituen helburuetako bat; lortu dugu; ba, agian seinale bat da'». Erabakia hartzea asko kostatu zaiola aitortu du halere, atzera-bueltarik ez dagoela jakinda: «Hobby bezala hasi nuen lan hau, eta horri amaiera ematea zaila da».
Pistatik harmailetara
Hamahiru urtez izan dira taldekide Menendez eta Arrojeria, eta, nola ez, mila momentu bizi izan dituzte elkarrekin. Hitz goxoak baino ez dituzte elkarrentzat. Menendez «eredu» izan dela adierazi du usurbildarrak: «Eskubaloiak, batez ere, pertsonak eman dizkit. Alba horietako bat da; halako konplizitatea lortzea ez da erraza izaten». Zarauztarrak, berriz, Arrojeria taldekidea baino zerbait gehiago izan dela esan du: «Bera gabe, azken hamahiru urte hauek ez ziren berdinak izango; bidelaguna izan da». Pozik daude azken puntua elkarrekin jarriko dutelako.
Ez da Bera Berako bi kapitainek erretiroa batera hartuko duten lehen aldia. Umorez komentatu du Garmendiak: «Klub honetan ez dakigu banaka erretiratzen». Hain zuzen, hark eta Esme Lopezek batera utzi zioten jokatzeari 2010ean, eta baita Eli Pinedok eta Matxalen Ziarsolok ere 2016an.
Arrojeriaren eta Menendezen txanda da orain. Biek bat egin dute ibilbideko une onenetako bat azpimarratzean: iaz «etxean» irabazitako Espainiako Kopa. Donostian aurreneko aldiz 2022an antolatu zuten txapelketaren azken fasea, eta ordukoa ere, irabazi ez arren, garrantzitsua izan zela uste du Arrojeriak: «Gu finalean egon gabe ere arrakasta eduki zuen, eta uste dut Gipuzkoako eskubaloian mugarria izan zela. Iaz, antolakuntza bikain hori errepikatu, eta gainera kopa guretzat geratu zen. Momentu hori betiko gogoratuko dugu: ez bakarrik titulua eskuratu genuelako, baizik eta jende asko harrapatu genuelako. Kopa horietatik jende asko hurbildu da eskubaloira; jarraitzaile asko irabazi ditugu».
«Auzoko klub bat ginen lehen, eta, nolabait, hiriko kluba gara orain; Gaska bete ere egin dugu»
ALBA MENENDEZBera Berako jokalaria
Klubak hazten eta mugarriak jartzen jarraituko duela uste dute, gainera. Menendezen esanetan, oraingoa «hasiera» baino ez da, eta momenturik onenak iristeko daude. Lortutakoari ere aitortza egin dio: «Auzoko klub bat ginen lehen, eta, nolabait, hiriko kluba gara orain; Gaska bete ere egin dugu».
Datorren sasoirako bi jokalari garrantzitsu galduko ditu taldeak, baina bi zale irabazi. Pistan ez, baina harmailetan izango dira Menendez eta Arrojeria. «Harmailak bi fan irabazi ditu. Hortxe egongo gara».
