Bi aste eskas dira liga hasi zela. Baina dagoeneko lehen etena izango du hurrengo asteburuan. Horren aurretik, laugarren jardunaldiko partidak jokatuko dituzte Alavesek, Osasunak eta Realak. Arabarrek Las Palmas jasoko dute, (Dazn, 17:00) eta nafarrek, Celta (La Liga, 17:00); gipuzkoarrek, berriz, Getaferen zelaian jokatuko dute (La Liga, 19:15).
Alavesek hiru puntu baliotsu eskuratu zituen asteazkenean Realaren zelaian, eta gaur sasoiko lehen garaipena lortu nahi du etxean. «Etenera zazpi punturekin iristea oso garrantzitsua litzateke», berretsi zuen atzo Luis Garcia Plaza teknikariak. Horretarako, Las Palmas hartu beharko du mendean. «Baloia izatea eta lasai jokatzea gustuko du taldeak, baina aurreko sasoian baino zuzenago jokatzen du, eta jokaldi gehiago amaitzen ditu».
Oso bestelako aho zaporearekin amaitu zuen aste barruko jardunaldia Osasunak. Gorritxoei bizkarrekoa eman zieten Gironan, 4-0 galdu baitzuten. Baina aurrera begiratzeko beharra nabarmendu zuen Vicente Morenok. «Taldeak bere ohiko ezaugarriak berreskuratu behar ditu». Ostegunean taldera iritsi zen atzelaria, Enzo Boyomo, deialdian da.
Realak etxean jokatutako bi partidak galdu ditu, eta, zalantzak uxatzeko, Getafen irabazteko erronka du. Talde deserosoa da Jose Bordalasek zuzentzen duena. Haren inguruan ondorengo hau adierazi zuen Imanol Alguacilek. «Gauza asko egiten ditu ondo, eta errespetu handia diogu. Detaile txikiek erabakiko dute partida». Fitxaketen merkatua ixtear zela baieztatu zituen talde txuri-urdinak Nayef Aguerd atzelariaren eta Orri Oskarsson aurrelariaren fitxaketak. Biak atzo ailegatu ziren Donostiara, eta deialdian dira. «Oso gustura nago dudan jokalari multzoarekin; orain, nire lana da jokalari bakoitzari etekinik handiena ateratzea».
