Lehiak ez du etenik. Osasunak eta Alavesek gaur jokatuko dute berriro. Espainiako Ligako zazpigarren jardunaldiko partidak jokatuko dituzte. Etxetik kanpo ariko dira biak: nafarrek Valentziari egingo diote bisita (19:00, Movistar La Liga); arabarrek, berriz, Real Madrili (21:00, DAZN).
Oso ondo ari dira biak: Alaves seigarren postuan dago, hamar punturekin, eta Osasuna, zazpigarren, kopuru berberarekin. Biek irabazi dute azken partida, biek etxean, eta biek 2-1: arabarrek, Sevillari, eta nafarrek, Las Palmasi.
Bietan Alavesek du erronkarik zailena gaur. Datu batek islatzen du ondoen zer-nolako balentria den Bernabeun irabaztea: azken 23 partidetatik 22 irabazi ditu, eta bat berdindu. Sekulakoa litzateke Alavesek punturen bat lortzea.
Horixe nabarmendu zuen atzo Luis Garcia Plazak. «Datuek beldur ematen dute, baina lehiatu beharra dugu; lehiatzen bagara, aukera izango dugu. Horretan jarri behar dugu indar guztia. Zerbait polita egiteko ilusioa izan behar dugu. Zaila da, baina futbolean ez dago ezinezkorik».
Osasunak, berriz, joera eten nahi du: Sadarren, hiru partida irabazi ditu, eta bat berdindu; etxetik urrun, berriz, bi partidak galdu ditu. «Ea hirugarren aukera balekoa den. Emaitza ona lortu nahi dugu bide onean jarraitzeko», esan zuen atzo Vicente Morenok.
Valentziari buruz, berriz, azaldu zuen sailkapenean ez dagoela ondo —lau puntu ditu—, baina irabazi egin duela azken partida —2-0 Gironari—, eta «ziur» dagoela «gora» egingo duela. «Ez digu emango erraztasunik».
