Uztailaren 14a

Pariseko erdian indarkeria goraipatzen duen monumentu bat da Garaipen Arkua. Odola isurtzea gonbidatzen duen nazio ereserkia abesten dute han: «qu'un sang impur abreuve nos sillons». Borrero jeneralak heroi bihurtu zituzten. Estatuko zeremonian armadak parte hartzea momentu nagusia da. Horregatik harro daude. Hori gutxi balitz bezala, Frantziako Legio Atzerritarren mertzenarioak agertzean gonbidatuak altxatzen dira, krimenari ohore emateko. Meza beltz horretan gurtzen duten estatuko erlijioaren jainkoak sufrimendu handia zabaldu du munduan; eta zenbat gehiago ekarriko du?