Osakidetza eta euskara

Gai polemikoa da osasuna eta euskara elkar ulertaraztea. Garrantzitsuena osasuna dela eta euskara bultzatzeko beharrezko diren esfortzuak alde batera uzteko arrazoiak aurkitzen dituzte. Bada, ez dut ulertzen nola den posible: gazteleraz eta portugesez idatziriko testu bat sinarazi zidaten gure bigarren haurra jaio eta bi egunera egin behar zioten proba bat baimentzeko. Tratatu genituen gehienek ez zekiten euskaraz, edo ez zuten egiten behintzat. Hori uler dezaket, eta esan beharra daukat oso arreta ona eskaini zigutela Donostiako Ospitalean. Baina ez dut ulertzen nolaz zegoen gazteleraz eta portugesez testu hura. Atzerritar bati bere hizkuntzan eskaini ahal balitzaioke nondarra den begiratu gabe, asko irabaziko genuke, batez ere ospitale batean sinatu behar diren testuak ongi ulertu beharrekoak direlako, gaizki-ulertuak ahalik gehien ekiditeko, baina euskaraz behar luke bai ala bai. Ez dago aitzakiarik.