Markel Olano jaunari:

Ekainaren 4an BERRIAn Alardeari buruz zuk esana —«Alardea ulertzeko modu diferenteak daude, eta guk biak errespetatzen ditugu. Ez dugu baten alde egiten»— irakurri dudanean, asaldura, amorrua eta etsipena sentitu dut. Bi Alarde daudela agerian dago. Bata, «tradizionala» deiturikoa, emakumei parte hartzea debekatzen diena, emakume izateagatik soilik. Eta beste bat, emakumek eta gizonek berdintasunean parte hartzea ahalbidetzen duena. Errespetagarria ez dena ezin errespetatu, Olano jauna, alarde tradizionalak emakumea ez baitu inolaz ere errespetatzen XXI. mendean. Gipuzkoako ahaldungai nagusiak esandakoa onartezina da, gizartea gizon eta emakumeok osatzen dugun heinean edozein ekitalditan parte hartzeko eskubide osoa baitugu, gizonek bezainbeste. Emakumeak edonora, Olano jauna.