Guztiona dena ahulduz

Azken urteotan sektore pribatua indarra hartuz doala ikusi dugu. Berez, ez da txarra noiz eta ez duen guztiona dena eta guztion artean izerdiz eta odolez eraikitakoaren kontra egiten. Hor dugu osasungintza pribatua, komunikazioak, elektrikak edo funtzio publiko oso garrantzitsu bat betetzen duen gertuko merkataritza.

Lehia bat irudika genezake publikoa vs pribatua. Argi dago sistema bera sektore pribatua laguntzeko konfiguratuta dagoela. Baina zer pentsatuko zenukete sektore publikoak pribatua laguntzen ari dela esango bagenizueke? Hori esateko asmotan idatzi ditugu lerro hauek. Gure esparrura mugatuz, Hondarribiko Udalaren jarrera salatu nahi dugu.

Pandemia hasieran txundituta utzi gintuen udalak kontingentzia planaren txostena enpresa pribatu batek egina zela jakin genuenean. Guk ausardiaz eta informazio gardenarekin aurrera egiteko eskatu genion etengabe, baina alferrik. Ez hori bakarrik; udal instalazioetan sortutako kutsatzeen aurrean zer egin edo ez erabaki zutela ikusirik udal honen publikotasuna ezbaian jartzen hasi ginen. Ondoren, bi urtez eskatzen aritu ondoren, legealdi plana aurkeztu zuen udal gobernuak herriari eta udal ordezkarioi. Legealdi plana gobernuak irauten duen bitartean zeure buruari helburutzat jartzen dizkiozun erronkak dira, ba hau ere enpresa pribatu batek landua izan da, ikaragarria. Eta gure pazientzia agortu duen azken tanta. Irungo Udalak jaiak bertan bera uzten zituela adierazi bezain pronto, Txomin Sagarzazu alkateari zera esan genion, Hondarribiko jaiak egiteko egoera ez genuela ikusten eta mesedez iniziatiba hartu eta adierazi zezala udalak bertan behera uzten zituela jaiak.

Beste behin publikoa eta guztiona dena txiki, menpeko, iniziatiba gabe eta morroi ikusi dugu. Hondarribiko alarde fundazio pribatua EITBn azaldu zaigu Hondarribiko jaien festa nagusia egingo ez dela esaten. Lotsa eta haserrea sentitu dugu. Emakumeen eskubideak zanpatzeko eta Borja Jauregiren agintaldian diseinatutako entitate pribatuak erabaki du aurten gure herriko jaien festa garrantzitsua ez dela egingo, haiena soilik izango balitz bezala eta udalak, herritar guztiona den etxeak, horren inguruan erabakitzeko ahalmena ez balu bezala. Aski da! Alarde publiko, parekide eta bakarra orain! Ez dugu etsiko denok gure herriko jaietan parte hartzeko aukera eduki arte!