Denboraldi luze batean albiste dramatikoen lekuko izaten ari gara, eta irudi horiek zalantzan jartzen gaituzte benetan gizarte zibilizatu batean edo basati-senez betetako mundu batean bizi garen. XXI. mendean gaude, baina antzinako dinamiketan harrapatuta jarraitzen dugu. Dinamika horietan, boteretsuak indarkeria erabiltzen dute besteak menderatzeko, sarraskiak eginez edota pertsonak zapalduz.
Gaur ere, antzinean bezala, lider boteretsuek ez dute bakarrik jarduten. Beti dituzte aliatuak, mesedeak jasotzeko asmoekin, eta morroiak, era guztietako aginduak beteko dituztenak. Lider horiek (besteak beste, Hitler, Stalin, Franco, Pinochet, Putin, Netanyahu eta beste mordo bat) ez dira bakarrik aritzen; idealak eta helburuak partekatzen dituzten pertsonak dituzte inguruan. Eta morroi horiek, hau da, poliziek eta militarrek batik bat, komunitate osoak suntsitu dituzte. Emakumeen, zaharren eta haurren aurkako indarkeria-ekintzak ere egiten dituzte, batzuetan aginduak jarraituz eta beste batzuetan, albistegietako eta dokumentaletako irudiek erakusten dutenez, krudelkeria eta amorruak bultzatuta. Ekintza horiek gauzatzeko, askotariko armak erabiltzen dituzte, beti armak, beren borondatea ezartzeko eta sufrimendua eragiteko. Eta, jakina, eszenaren atzean lasai asko egongo diren boteretsuenek irabazi handiko negozioak egiteko.
Indarkeria-ziklo horrek bere horretan jarraituko du jarrera horren aurka daudenek irmo adierazten ez badute. Manifestazioak garrantzitsuak dira egoera horren aurka gaudela adierazteko, baina gizarte-baliabideak eta antzeko erakundeak ere aprobetxa ditzakegu ahaleginak batzeko eta indar kolektibo bat erakusteko, aldi bereko ekintzak antolatuz, munduari erakusteko oraindik badirela denentzat etorkizun hobea bilatzen duten pertsonak.
Ahalegin horiek armak murrizteko eta ezabatzeko abiapuntua izan behar dute, baita gerrei amaiera emateko ere, gatazkak konpontzeko bide gisa. Gatazkak beti existituko diren arren, ez dira indarkeria armatuz konpondu behar. Horrela, ez direlako benetan konpontzen.
Armei ez. Gerrei ez.
