Ez dute ezer ikasi

Aitor Zabaleta Kortazar zale txuri-urdinaren erailketaren urteurrenaren atarian —1998ko abenduaren 8an Madrilen hil zuten Frente Atletico taldeko ultra neonaziek, Kopako partida baten aurretik—, azken asteetan albiste kezkagarriak aurkitu ditugu Donostiako kaleetan eta Anoetako kirol-instalazioetan, Espainiako LaLigako futbol klub batzuetako (Betis, Atletico, Valencia) ultra neonazien presentziari buruz. Bertan, Espainiako nazi-faxismoaren sare politikoko hainbat kide izan dira, parafernalia nazi-faxista konplexurik gabekoan, kalejirak eginez, kontsignak jaurtiz eta Cara al sol abestuz.

Gure herriak urtero gogoratzen du, omenaldi eta ekitaldi anitzekin, AitorZabaletaren hilketa koldarra, behin etaberriz arbuiatu dituen bezala jarrera nazi-faxistak bere kaleetan, ekintza eta eraso mota guztiak bezala (Donostian 1936an fusilatu zituzten 556 pertsonak gogorarazten dituen eskulturaren azken erasoa).

Ekitaldiekin bat egin dute, behin baino gehiagotan, erakundeetako, politika munduko, prentsako edo Aitor jarraitzailea zen kirol erakunde txuri-urdineko ordezkariek. Galdera orain nahitaezkoa da: ez al dute ezer ikasi 24 urtean, ordezkari horiek?

Ezin da bigunak eta zatiezinak izaten jarraitu gorrotoaren ideologiarekin, gorroto mezuarekin, gorroto diskurtsoarekin eta gorrotoaren sinbologiarekin. Aski da! Argazki erraztuan eta kondena antzuetan izena emanez gero, pauso bat aurrera eman behar da eta modu konprometitu eta aktiboan borrokatu behar dira ultra nazi-faxista horiek, gure kaleetatik eta gure kirol instalazioetatik kanporatzeko, non gorrotoa inposatzen saiatzen diren (arrazista, xenofoboa, sexista, homofoboa eta faxista). Ez dugu biktima gehiagorik nahi, ez hemen, ez inon. Atzo, gaur, beti, Aitor Beti Gogoan!