Alde batera utzi dituzte Pasaiako herritarrak

Pasai Antxon topoa lurperatzeko proiektua 2016an hasi behar zen,Altzako geltokia amaitzean. Baina Pasaiako Udalaren desgobernuak duen inoperantzia eta utzikeria ikusita, proiektu hau sine die atzeratu da enegarren aldiz. Erakundeek zor moral, etiko eta politikoa dute pasaitarrokin eta bereziki antxotarrokin. Pasaitarrok nahikoa dela esan dugu. Nazkatuta gaude Pasaiaren aldeko apustu garbia egiten ez delako. Erakundeek, horien artean Eusko Jaurlaritza, Gipuzkoako Foru Aldundia, ETS edo Pasaiako Udala bera, alde batera utzi dituzte pasaitarrok eta gure beharrak. Baina gauzak argi utzi behar dira. Antxotarrok topoaren lurperatzea eskatzea ez da kapritxoa, ezta gutxiagorik ere. Topoaren egitura osoa sostengatzen duen eta Pasaiako bigarren barrutirik populatuena bitan banatzen duen zubiak narriadura handia du, udalak obra txiki eta tranpa-zuloen bidez ezkutatu nahi izan badu ere. Gainera, zubibide horrek 800 etxebizitza ditu inguruan, hamabost minutuan behin topoaren soinua jasan behar duten familia-etxebizitzak. Uda, negua, astelehena edo igandea izan, topoaren zarata etxeko leihotik metro erdira. Hori al da bizi-kalitate onaren sinonimoa?

Urteak igaro ahala, topoa eusten duen bidezubia kentzea eta hura lurperatzea ezinbesteko bihurtu dira Antxoko barrutiaren garapen urbanistiko, kultural eta sozialerako; hori ez egiteak eragin zuzena du antxotarron bizi-kalitatean. Herria azpiegitura zaharkituak izatera kondenatzen du, eta segurtasunerako puntu beltz garrantzitsuak sortzen ditu. Aipatutako guztia topoaren lurperatzea eskatzeko arrazoien lagin txiki bat besterik ez da, gehiago ere badaude. Bada garaia erakundeak lanean hasteko eta Pasaiako biziberritze hain kakaratuaren denbora galdua berreskuratzeko. Pasaitarrok merezi dugu.