Sator-bideak

Duela hilabete luze, Iñigo Aranbarrik Galizia ekarri zuen gogora. Herrien arteko elkartasuna hizpide izan, eta Galiziaren itzala txikia izan ohi delako. Europako Hauteskunde kanpainan, aldiz, gogora ekarri da Galizia, oihartzun laburrean bada ere. Besteak beste, edo batez ere, alderdi politiko abertzaleek aliantza politikoak egin dituztelako Galiziako alderdi nazionalistekin. Galizia-Euskal Herria aliantza politikoa ez da berria Europako Hauteskundeetan, baina, koalizioak, ordea, ez dira iraunkorrak izan, eta haien arteko elkarlana ere ez. Hauteskundeak dituzte helburu nagusi koalizio horiek.

Itun politikoaz beste, ordea, euskal kulturan bada kultur elkartasunik Galiziarekin, eta kultura galego-portugesarekin. Euskal poesian du kultur elkartasun horrek bidea egin. Poeta talde esanguratsu batek egin ditu sator-bideak euskal poesia eta poesia galego-portugesa lotzeko. Eta itzulpena izan dute tresna nagusi sator-lan horretan.

Literatura Eskolako maiatzeko saioan, Gerardo Markuletak euskarara ekarritako poesiaz jardun zuen, eta poesiaren itzulpenaz ohar jakingarri askoak egin zizkigun. Joseba Sarrionandiak poesia galegoa itzuli egin zuela gogora ekarri zuen. Duela hamahiru urte argitaratu zuen bildumatxo hori Susak, Poemas naufragos. Galegoz heldutako poemak (Susa, 1991). Maiatzaren 17a gogoan argitaratu zen bilduma, gaurko egunaren bueltan, Día das Letras Galegas. Ez zen izan Sarrionandia poesia galegoarekiko interesa agertu duen lehen poeta, ez eta bakarra. Sator-lan horretan aritu izan dira hainbat poeta: Gabriel Aresti, Koldo Izagirre, Itxaro Borda… Bazterreko jardun horiek —poesiaren itzulpenek—, gainera, bazterreko ahotsak gorpuztu izan dituzte. Euskal poesiaren historiek eta euskal kulturaren diskurtsoek ez dute elkartasun-zubi hori hain ikusgarri egin, eta gaur, Letra Galegoak omentzeko keinurik onena hauxe, elkartasun poetiko hori gogora ekartzea.