Heleta kultur hiriburu

Arrazoi dute Juan Alberto Bellochek eta Rosa Aguilarrek: Donostia kinieletatik kanpo zegoen. 2016ko Kultur Hiriburua Espainiari badagokio, ezin ulertu Espainiatik kanpoko hiri bati ematea. Donostiarrok espainiarrak ez zareten aitortza argiena egin dizuete egunotan zaunka ari direnek. Etxean ere zenbaitek onartu beharko du ez zela horren zale: askorentzat destaina da lehen erreakzioa erakundeetatik zerbait bultzatu eta dimentsio handikoa bada. Kritikoa izatea onerako da, baina ekimena aztertu gabe konpultsiboki kritikatuz gero, batzuetan atzera jo beharra dakar.

Ondarea ulertzeko, menosteko, oso irizpide berezia izan du euskal eskuinak. Babesak adierazten duena da zer suntsi daitekeen.Herri bateko hiru baserri babesten direnean, besteak txikitzeko baimena ematen ari dira. «Zer egin (eraiki) behar dut kanpokoek maita nazaten» izaten da euskararik jakin gabe Euskadi saldu nahi duten askoren jarrera, beti ere I need Spain. Bada, we need Europe, euskara ingelesez erakutsi konplexu zahar guztiak astinduta. Ondarea babesteko harriak baino gehiago da, bizirik landu beharreko zerbait. Egunotan adibide, Heleta. Garenetik abian, mundura konplexurik gabe begira. Ez erakusleiho ideian, hain gutxi euskara kuota bihurtzen den Bilboko makrojaialdia, diruz gainezka eta nortasunik gabe.

Urteotan bisitatu ditudan herri independente berri gehienek europarzaletasuna dute ezaugarri. Independentziarako berme eta itxaropen ikusi dute. Horrek ez du kentzen etxeko lanak egin beharra, baina urtetan txikitasunari trufa egin dion metropoliari baino, era naturalean kokatzen garen herri txikien testuinguruan lasaiago mugituko gara. Europari bizkar eman eta Latinoamerikara begiratzeko jarrera hispanikoa gurean ere oso errotuta dago. Badugu garaia, hispanitatea gaindituta, Europari garena adierazteko. Gurean euskaraz, kanpoan ingelesez, eta gainontzeko guztiak hautazkoen eremuan utzi.