Trump presidente hautetsia bildu da Obama presidente jardunekoarekin. Hedabideek esan dutenez, bien taldeek zenbait hil daramatzate elkarrekin biltzen, isil-gordean, gertakizun hau gertatuko balitz. Trantsizioaz hitz egin dute. Azkar eta ongi egiteaz.
Trantsizioak, Hegoaldeko hizkeran behintzat, nirean alegia, ez du behin-behinekotasun adiera berezirik. Ez duzu erraz topatuko Espainiako Trantsizioa, horrela, hitz larriz, noiz amaitu zen zehaztuko dizunik edo amaitu dela esanen dizunik: inoiz amaitu ez delako seinale (eta amaitu ez diren gauzez zilegi da inoiz hasi ote ziren zalantza egitea). Gehienez ere, bigarren trantsizio baten beharra aipatuko dizute. Lehenengoa amaitu delako irudipena eman dezakeen zerbait, baina bigarrenak lehenengoak bezain apurtzailetik gutxi baldin badu, ez da kezkatzekorik, ez du inork nabarituko noiz hasi eta noiz amaituko.
Nafarroan ere behin-behineko xedapen batek, Foru Hobekuntzako laugarrenak, hain zuzen, ez du traza handirik behin-behinekotik. Hegoaldeko lau eskualdeak batzeko aukera legala ematen duen artikulu horrek hogeita hamalau urte bete ditu eta osasun ona du. Mehatxu zein utopia zaien guztiek urrun ikusten dute: oreka eta diskurtsoa gordearazten duen gailu betikogarria.
JIRA
Trantsizioa
Iruzkinak
Ez dago iruzkinik
Ordenatu
